Pamiaduangan karing Pamantasan, Pamiyubug karing Kayanakan
Metung karing daralanan da ring estudyante king karelang pamag-aral lalung lalu na ring mag-aral king kolehiyu iya pin ing internship o on-the-job training (OJT) program. Ing mesabing programa ali ya mu anting compliance o estadung kailangan dalanan ban mayari king karelang kurso nune metung yang pamikatagun ban lalung linangan ing karelang gelingan kapamilatan ning aktuwal a karanasan ning pamakipag-obra karing institutsyun o organisasyun dikil king luluban dang propesyun at kayausan. Makanyan mu naman, metung ya iting pamikatagun ban lalu dang akit at abitasa ing karelang propesyun a luluban, ban lalu do pang akilala at alinang ding karelang kakayanan, at makabalu pang bayung beluan at gelingan ibat karing mag-obra na karing mesabing propesyun a karelang pakiabayan.
Ing SACOP anting metung a institusyun makabuklat ya gamat tinanggap mag-aral king kolehiyu para king karelang internship program at maki-aduangan karing pamantasan king pamiyubug karing kayanakan. Karing mapilang milabas a bulan, meki-aduangan ya ing institusyun king Don Honorio Ventura State University (DHVSU) at University of the Assumption (UA). Bayu ya megmula ing programa, pepadala la pang Letter of Recommendation ding 2 pamantasan at ginawang kasunduan kapamilatan ning Memorandum of Agreement (MOA) ban maging malino karing kayaduangan a institusyon at king SACOP ing kapagnasan na ning programa at ing obligasyun ning balang metung at parasan karing estudyanting miyantabayanan. Para king mesabing programa, megsilbi ya ing SACOP anting “Host Training Establishment” (HTE).
Para king pamiaduangan king UA, miyantabayanan la ding 8 student-interns a kukua king kursung Bachelor of Science in Pharmacy. Kapamilatan na niti, dinalan la ding student-interns king 150-hours of industrial pharmacy internship kayantabe ning Social Enterprise Officer at Pharmacist ning SACOP PANULU (Social Enterprise). Kalupa ning megawa, mituru la ring student-interns patungkul king system management, shelving da ring panulu, at pamagsadya karing purchase orders at pamag-deliver karing kliyenti.
King sumangid a banda, para naman king pamiaduangan king DHVSU, miyantabayanan la ding 11 a student-interns a kukua king kursung Bachelor of Science in Social Work. Kapamiltan na niti, dinalan la ding student-interns king Supervised Applied Learning Experience kayantabe ning Head at Social Workers ning Community Building Services Unit ning institusyun. King kilub ning internship period da, mituru la ring student-interns patungkul king case management da ring iskolar ning SACOP Educational Assistance Program (SEAP) at ing community profiling da ring asistyang grupo lalam ning Intergrated Community Organizing (ICO) Program. Subali kareti, sinaup la naman ding anak karing miyaliwang aktibidades kalupa ning medical missions, relief assistance, pamamie trainings, at karing miyaliwa pang pagobran na ning metung a social worker.
Kalupa ning asahan, meging mabunga ya iting pamiaduangan karing anak, pamantasan, at king mismung SACOP. Megi ya iting mabunga karing student-interns at karing karelang eskwelang kabibilangan uling megi ya iting oportunidad ban lalu pang malinang ing karelang abilidad at beluan anting kapagsadian king luluban dang propesyun. Makanyan mu naman, meging mabunga ya naman iti king SACOP pauli na ning megi yang instrumentu at parti king pamiyubug da rening kayanakan. Mekasaup la naman king misyun ning apostolado ding student interns kapamilatan ning aldo-aldo pamangusal king pamaimplementa nang programa at serbisyu.
Manananu na sanang ali mu ing karelang gelingan ing meyubug pati na rin sana mitanam karela ing diwa na ning apostoladu – ing pamagsilbi kareng pakakalulu, magkasakit at mangailangan. Ing karela sanang karanasan king luluban dang propesyun at kayausan maging dalan ya ban misundu mu naman ing misyun ning SACOP – ing maging dalan painturu king KANAWAN ning BIE.
