Integrated Community Organizing: Miyubug ing Pangatau, Sinulung ing Komunidad
Kapamilatan ning Integrated Community Organizing (ICO) lalam ning Community Building Services Unit (CBSU), mipapakibatan ya ing misyun at kayausan ning apostoladu king pamagbuu at pamag-organisa karing pakakalulung komunidad ban mibayu la at maging Kristiyanong komunidad. Parte na ning kasaupang darake ya pin ing pamiyubug king kakayahan at kapasidad da ring peoples’ organizations (POs) kambe da ring kanya-kanyang miyembrung makasangkut.
King prosesu ning pamag-organisa, dadalan la ring POs king miyaliwang Stages of Community Development. Patse meyakit na ing metung a grupo a atin neng kapasidad talakad king keyang sarili at malyari neng i-classify anting metung a graduated community, kailangan na niting dumalan king ausan tamung organizational diagnosis/ organizational evaluation ban lauan ing kasalukuyang estadu na ning organisasyun agpang king Stages of Community Development.
Anting paralan ning pamagpatune king meging panyulung ning organisasyun, kapamilatan ning evaluation, 1) silipan la ding miyaliwang dokumentu at reports ning grupo; 2) surian ya ing meging epektu na ning programa king pamanyulung ning organisasyun, kambe ring miyembru, at ning mabilug a komunidad; 3) tukuyan la ding stratehiya at pamamaralan a mekasaup king panyulung; at 4) lauan nung malyari ne ing organisasyun talakad king keyang sarili.
Metung a meyakit a organisasyun a malyari nang mag-graduate bayu ya mayari ing banuang iti ya pin ing San Lorenzo Ruiz Active Peoples Association, Inc. o SAPA, Inc. a makabase king Sitio San Lorenzo, Sapalibutad, Angeles City. King pamakiaduangan ning CBSU king Administrative Division – Technical Services (AD-TS) ning SACOP, meganap ya ing organizational evaluation anyang 31 Agosto 2024 king multi-purpose hall ning sitio. Tinagun la king mesabing aktibidad ding miyembru at opisyales ning grupo at ding miyaliwang stakeholders (representatives ibat king Chapel Pastoral Council (CPC) at Barangay Council (BC)). Para king metodolohiya, megawa ya ing review of organizational documents kalupa da ring board resolutions, minutes of meetings at BEC sessions, project monitoring report, financial reports at miyaliwa pa. Maliban kaniti megawa ya naman ing guided interview karing miyembru ning grupo. At kakataulian, megawa ya ing focus group discussion karing representatives ibat king CPC at BC.
Agpang karing pekibat da ring miyembru, mapilan karing sangkan nung bakit mekiabe la king grupo: makabuung pamikaluguran karing abe da king komunidad, ban tumibe ing pamisasanmentung da karing aliwa, at ban makapakiabe karing kimutan at aktibidades king komunidad. King pamakipagkwentu karela, abanggit da la naman ding mapilang bage megbayu king bie da kayari dang mekiabe king grupo – melalam ing kasalpantayanan da king Ginu, mebiasang makiabe anting siping bale at kaluguran, meging mas masaya ing bie da, at mika-grupo la ring kebabainan king Sitio San Lorenzo.
Ibat naman king pamakipagkwentu karing representatives ibat king Barangay Council at Chapel Pastoral Council, petutuanan da ing maulagang papel ning grupo king pamidakeng kasaupan king komunidad at karing abe dang manuknangan karin. Karing megawang focus group discussions, kinwentu da ring mekumbira ing pamakiaduangan da king pisamban at barangay lalu na karing aktibidades a gagawan ning grupo a makasaup king panyulung ning pamibie-bie at bie espirituwal da ring king komunidad. Makanyan mu naman, inapse da ing asahan dang mas matibeng pamiaduangan at suportang idake da para king kimutan na ning organisasyun.
King megawang organizational evaluation, masalang meyakit nung makananung, kapamilatan ning Integrated Community Organizing program, midadake yang kasaupan ing apostoladu karing pakakalulung komunidad – kapamilatan ning maulagang papel na ning apostoladu king pamibayu at pamiyubug king pangatau da ring miyembru. Maliban kaniti, kapamilatan ning pamag-organisa, ali mu mibabayu ing aldo-aldo pamibie-bie da ring miyembru nune king mas malawak a panlalawe, ding mebuung peoples’ organizations ding maging instrumentu king pamagdalang KANAWAN ning BIE king komunidad a nung nukarin la makasaut.
