Pamagpalalam ning Kaguiuan, Pamanyulung ning Kasaupan
Anting metung a institusyung midadake kasaupan karing pakakalulu kapamilatan da ring social services and developmental programs, metung a paralan ban maging mas epektibu ing pamanantabe karing pakakalulu iya pin ing masalese pamagsadya ning sarili – ing SACOP lalung lalu na ring keyang talasuyu o talapagobra. Inya pin sa, nung atin man pamikatagun miyayabie ban sumulung ing pangatau, beluan, at abilidad da ring empleyadu kapamilatan da ring trainings, seminars, webinars o kaya naman short courses patungkul king karelang propesyun, malagua na lang kukuanan ding oportunidad a reni para king kapakanan da ring empleyadu at lalung lalu na para karing kliyenti na ning apostoladu.
King inisyatibu ning Administrative Division-Human Resource (AD-HR) at Community Building Services Unit (CBSU) ning SACOP, meki-aduangan ya ing institusyun king Asian Social Institute (ASI) para king karelang International Diploma Course in Community Development (IDCCD). Pedala ya ban mag-aral at magsane i Mr. Giofranz O. Enriquez, RSW, metung karing community development specialists ning CBSU a kasalukuyang mamantabe king komunidad ning Sitio Matahimik at Sitio Target. Megumpisa ya ing pamag-aral na anyang May 07, 2024 at meyari ya anyang June 28, 2024. Parte ning kayang pamag-aral ing pamagpalalam pa king beluan na king Community Development at makanyan mu naman ing pamagtalake karing bayung trends king mesabing larangan. Maliban kaniti, bayu ya meyari ing kayang pamag-aral, mika-immersion a nung nukarin mekiabiayan at mekituknang ya karing manasan o fisherfolk king Bolinao, Pangasinan.
Masaya neng dinakeng Mr. Enriquez ing kayang meging karanasan king meging immersion na, “Meging makabuluhan ya kaku ing pamag-aral ku king ASI king kursung International Diploma Course in Community Development (IDCCD). Abe na ita ing dakal ku abalu at ing kesantingan na nita ali mi la mu kabud ababalu nune dapat balu mi la rin i-apply ding kekaming abalu. Dakal milyari king kilub ning walung domingo a pamag-aral. Misan ali kami mu kabud mag-lecture, atin ke rin Cultural Night, at ginawa kaming photo museum. Meging masaya uling mikakasundu kami walung abe-abe – 4 a Pilipino at 4 a foreigner. Ila di Rod, Barry, Sr. Connie, Astha, Raymond, Matthew at I Shing Ling. Alus ing aldo-aldo memorable yang experience kaku kasi dakal ku ababalu. Pero siguru ing peka-memorable a experience kaku anyang meg-7 days immersion kami king Barangay Pilar, Bolinao, Pangasinan. Maygit limang oras ing byahi papunta Santiago Island. Adwa kaming grupu, ing kabilang grupu ken lang kabilang barangay. Disnan mila reng organisasyun karin na milagyuan SAMMAKA o Samahan ng mga Mangingisda para sa Kalikasan. Metung karing proyektu da ing mangrove reforestation na meging matagumpe la karin at megi yang tourist attraction ngeni. Anyang melakwan na kami karin, miras ku kang Nanay Nong. I Nanay Nong at ing asawa na i Tatay Gidion ilamu ing makatuknang keng bale. Parehu lang senior citizens at edad na lang 74 years old. Kabang mipag-kwentu abalu ku na angga ngeni papalawut la pa king dagat ban manasan. Kitang ku nung nanu la oras papalawut king dagat, aldo-aldo king oras ning alas singko ning abak mamako nala ban manasan. Inya kinabukasan maranun kung migising ban tuki karelang manasan. Mipakirut la uling obat maranun ku megising, sinabi ku tuki ku karela. Anyang atsu na kami dagat atin lang awsan “baklad” nung nukarin la makasabit ding karelang net ban manasan. Atin aldo na dakal la akakwa, atin namang aldo na maritak mu akakwa. Ing kapitna titinda da la, ing kapitna ya pin ing uulam da king patingapun. Bayu ke miras king bale atin na maka-abang a tau ban saliwan ding arakap ming asan. At I Nanay Nong, tambing ne kukua para pamangan mi. Karin ku a-appreciate ing simpling bie, itang agnan-agnan mamangan, panayan daka miuli ban mangan. Reng tau karin maganaka at saguli la mu pakiabayan. Eme probleman ing pamangan mu uling atin ka akua. Meging emosyunal ku anyang palako na kami king area, dininan na kung Nanay Nong metung a bag a gagawan da karin at dried fish na iya mismung ginawa. Sinabi na kaku na sana mibalik ku pa.”
Kalupa ning sasabian da, tutuknang yang susulung ing pangatau ning metung a indibiduwal potang dinatang ing panaun a nung nukarin ali ne makabuklat ing sarili na ban magaral at milako ne sigasig ban makabalu pang bayung bage. Mekad makanini mu naman ing kasu king metung a institusyun. Mekad tuknang ya naman king panyulung ing metung a institusyun potang ding keyang talapagobra ali nala lalabung pangatau. Inya pin, makanini ing pagkapilitan ning SACOP ban lalu ya pa iting sumulung at makadakeng mas epektibung kasaupan karing mangailangan kapamilatan ning pamag-engganyu karing talasuyu nang ibuklat ing karelang sarili king pamagaral at pamagpalalam king karelang beluan at pangatau. Metung a paralan ning pamagpalalam ning karelang pangatau ban lumalam mu naman ing paralan ning pamidake king KANAWAN para karing pakakalulu at mangailangan.
Ing SACOP ya ing social service arm ning arkidiyosesis midadake miyayaliwang programa para karing pakakalulu at mangailangan kapamilatan ding kayang humanitarian programs and services at developmental programs karing coastal at uplandcommunties at urban poor settlements.
