MAGANAKA: Ganakan ing Milabas, Ganakan la ring Pakakalulu at Mangailangan
Balang daratang ing panaun ning pamaglapit ning Kapaskuan, ing Cloudstaff, metung a business process outsourcing company keti king Pilipinas, pagnasan nang munie at midake karing kayang sasakupan. Inya pin sa, miririnan lang oportunidad ding sablang empleyadu a miyabie ing karelang kapagnasan para king Kapaskuan kapamilatan da ring karelang wish lists. Ibat karing 700 a empleyadu ning kumpanya, mepili ya i Gilbert Torres ban ibie ne ning kumpanya ing kayang wish list. Dati yang misaupan i Gilbert king SACOP kapamilatan ning SACOP Educational Assistance Program (SEAP). Megi yang scholar manibat banuang 2008 anggang 2011. Meyari ya king kayang pamag-aral king St. Nicolas College of Business and Technology. Pauli ning pamigaganaka na king milabas a panaung inantabayanan ne ning apostoladu, meyapan ng Gilbert na ing wish list na ya pin ing midake at ibalik ing saup a minuna nang binie ning SACOP.
Anyang 24 November 2023, meganap ya ing gift-giving activity a nung nukarin minta ya ing Cloudstaff, kayabe ring mapilan karing karelang empleyadu, king SACOP ban idala at ibie ding wish list nang Gilbert, deti ila pin ding: educational materials, panulu para karing anak at matua ampong standard wheelchairs. King mesabing aktibidad, atsu ya naman ing metung karing kasalukuyang SEAP scholar, i Irish Diwa, ban tanggap karing saup. Lubus yang pesalamat i Irish king saup a binie ning kumpanya at dinake ne ing kayang kwentu: ‘’Ang tatay ko po ay magsasaka at ang nanay ko ay isang housewife. Hindi po nila ako kayang pag-aralin pero dahil po sa SACOP at sa inyo ako ay nakakapag-aral ngayon. Maraming salamat po kasi mayroon pong kagaya ninyo na walang sawang tumutulong at nagbibigay suporta sa aming mga scholars. Itong binigay po ninyo ay malaking tulong po hindi lang po sa akin kundi sa lahat po ng SACOP Scholars”. Metagkil la kapanamdaman ding empleyadu na ning Cloudstaff kayari deng dimdam ing kayang kwentu.
King mesabing pamitipun, pesalamat ya naman i Gilbert king Cloudstaff at king SACOP. Agpang kaya, maluat na nang pangarap ing mablas king saup a binie ning SACOP kaya. Sinabi na na maragul ya parti king bie na ing SACOP king pamag-aral na at king kasalukuyang estadu na ngeni king bie. Makanyan mu rin, personal yang pesalamat i Fr. Kenneth Alde, ing Executive Director, king saup a binie na ning Cloudstaff. Mepupus ya ing pamitipun kapamilatan ning pamiprisinta at pamag-award ning Certificate of Donation a penimunan nang Ma. Jesusa Molavizar, RSW, ing social worker a makatutuk king SEAP. Penimunan ne ning media team ning Cloudstaff ing pamagdokumentu king mesabing gift-giving activity at mipalabas ya iti king Year-End Party na ning kumpanya king Philippine Arena.
Tune ping miyayatad ing GANAKA at KANAWAN kapamilatan da ring taung makaganaka king milabas at lalung lalu na ding makaganaka karing kapatad tamung pakakalulu at mangailangan. Lubus ing saya at kapasalamatan ning apostoladu keka, Gilbert, pauli ning pamigaganaka mu king parti na ning bie mu a nung nukarin meging kaparti naka ning SACOP anting metung a scholar! Pagmaragul naka naman ning SACOP pauli ning pamigaganaka mu karing mangailangan lalung lalu na ring masakit a sasaupan at kayanakang antabayanan ning SACOP!
Ing SEAP megumpisa ya inyang 1996 anting pakibat karing magaral king kolehiyo a alus magyari na dapot mituknang uli ning kasakitan ning bie dela ning pamamakbung ning Bulkan Pinatubo. Megumpisa karing 30 estudyanteng ume ng mag-graduate inyang 1996, 500 nong estudyante ring susuportan ning SACOP king Academic Year 2022-2023, 40 kareni manibat ing panggastus da king Lamak ning Cruzada de Penitencia Y Caridad ning Virgen de los Remedios at Santo Cristo del Perdon.
Inyang milabas a academic year, 218 lang iskolar ring mig-graduate, 1 a magna cum laude, 5 kareni cum laude la, mapilan naman with honors la. Marakal kareng iskolar tamu dean’s lister at president’s lister la. Marakal kareng graduates tamu board passers la at magobra na, kasalukuyang sasaup kareng pamilya ra ban makaulagpus king kasakitan.
Agkatan da kayu pung maging donor at benefactor ning scholarship program ning kekatamung arkidiyosesis:
Account Number: 000703-4154-58
Account Name: Social Action Center of Pampanga, Inc.
Bank/Branch: BPI – San Fernando Dolores
Account Number: 00133-0433-244
Account Name: Social Action Center of Pampanga, Inc.
Bank/Branch: BDO – Pampanga San Fernando-San Isidro
Account Number: 676-3-67603946-6
Account Name: Social Action Center of Pampanga, Inc.
Bank/Branch: Metrobank – San Fernando McArthur Highway
G-Cash Number: 0977-142-2169
Account Holder: Justin Gatus
Dakal a salamat pu. Ing Apung Ginu a panibatan ning sablang kalam at grasya ya nang balang mablas king kekayung ganaka.
