75 Years Full of Grace, 34 Years Fullness of Life
King banuang iti, pagmasusian ne ning kekatamung arkidiyosesis ing ika-75 anibersaryu ning pangatatag na anting diosesis (Canonical Establishment as a Diocese of the Archdiocese of San Fernando, Pampanga). Megmula ya iti anyang 11 Disyembri 2023 at mapupus ya king 11 Disyembri 2024. Anting parti ning kapagmasusian, mepili la ring 7 Marian churches keti arkidiosesis anting jubilee pilgrim sites para king aktibidad a “Pilgrimage of Grace: 75 Years of Walking with Mary”. Kasabe na niting mesabing selebrasyun, pagmasusian ne mu naman ning apostoladu ing ika-34 anibersaryu ning keyang pangatatag – 34 banua ning KANAWAN.
At anting pamakisanmetung king kapagmasusian ning arkidiyosesis at king panyaus ban makiabe king Pilgrimage of Grace, megplanu at genapan ya ing mumunang dake ning pilgrimage karing 4 a pisamban anyang 19 Abril 2024. Iti tegunan de ding sablang regular staff at kitchen staff ning SACOP kambe da ring 2 pamuntuk a pari – I Fr. Kenneth Alde at Fr. Justin Gatus.
Mumunang minta king Archdiocesan Shrine of Our Lady of Lourdes, Cabetican, Bacolor. Pegselebran ya king mumunang pisamban ing Banal a Misa a penimunan nang Fr. Kenneth. King kayang homily, pinuntu nang Fr. Kenneth nung nanu ya ing metung a pilgrimage. Mipalino king homily na ing pilgrimage mumuna eya metung a excursion nune metung yang pamagsakripisyu sumangid ning pali ning aldo at lisangan ning panaun. Kadua, ing pilgrimage metung ya pamakitagmu ing Apung Ginu. Kapamilatan ning pamamunta karing miyaliwang pisamban, akatagmu ya ing Ginu king pamanalangin. At katlu, ing pilgrimage metung yang pamakitagmu karing kaparang tau. Kayari ning Misa, inumpisan at pengadian ya ing mumunang estasyun ning Via Lucis (Ing Dalan ning Sala). Mipamie la mu naman king mumunang pisamban ding jubilee passports a magamit.
Kayari king mumunang pisamban, tinaglus naman king Nuestra Señora del Carmen Parish, Pulungmasle, Guagua. Karin masaya lang sinalubung ding mapilang church volunteers ning parokya. Bayu ya sinundu ing pamag-estasyun, mengadi lang tahimik ding staff king makuyad a pinandit. Kayari ing pamangadi king estasyun, king metung karing hall na ning pisamban na mengan paugtuan.
Kayaring meugtu, minta naman king Our Lady of Sorrows Parish, Dolores, Xevera, Mabalacat City. Karas king pisamban sinundu ya ing pamangadi at pamag-estasyun. Anting panauli king mumunang dake ning pilgrimage, pintalan ya ing The Lord’s Annunciation Parish, San Vicente, Mexico. Karin ya pinupus ing pamag-estasyun.
Pauli ning pamikaindayu at kulang a oras ban puntalan la ding 7 pisamban, meyapan na isundu ya king aliwang aldo ing pamamaunta karing 3 pang mitatagang pisamban. Tune pin na ing karanasan ibat king pilgrimage megi yang pamikatagun ban mangadi at magsakripisyu. Metung yang pamikatagun akatagmu ing Ginu at ding kaparang tau.
