HUSTISYA AT KAPAYAPAN: Isundu ing Misyun nang Kristo, Isulung ing Hustisya at Kapayapan
Agpang king Vision – Mission Statement ning kekatamung arkidiosesis, masasambitla at mipapasyag kapamilatan na niti ing paintungulan at paninasan na ning Banal a Kapulungan keti king probinsyang Kapampangan. At ngana, “We, the people of God in Pampanga, committed ourselves, among others, to show concern for the protection and promotion of human life and to work actively for moral and spiritual renewal towards responsible citizenship and good governance; and to work for the renewal and formation of our leaders.”
Ban mipaltutu at maging kongkretu ya iting paninap, mekibat ya ing SACOP king hamun a iti kapamilatan ning pamisundu, pamamie pansin at prayoridad king pamisulung king adbokasiya patungkul king hustisya at kapayapan (justice and peace). Karing milabasan a banua, misusulung ya ing mesabing adbokasiya kapamilatan ning pamagdake legal assistance karing kapatad a Ayta a mamarap king miyaliwang kasu patungkul king karelang karapatan king gabun o ancestral domain. Ban lalu pang misulung ing adbokasiya king banuang iti, meging metung karing target na ning institusyun ing pormal a pamipatalakad king Justice and Peace Desk. Kapamilatan ning Justice and Peace Desk, misulung ing hustisya ampo kapayapan at panindigan ing bie at dignidad ning balang tau. Iti maging posibli kapamilatan ning pamagtas king kamalayan da ring tau dikil king kabanalan ning bie at ning karapatang pangtau. Subali kaniti, misulung mu naman ing kultura ning kapayapan at ing ulaga ning pamisabi (culture of peace and dialogue).
Anting pamag-umpisa, megawa ya ing metung a proposal dikil king pormal a pamipatalakad king Justice and Peace (J&P) Desk. Miprisinta ya ing mesabing proposal at me-apruban ya. King mesabing proposal, me-identify at me-articulate la ding miyaliwang program components. Deting components ila ring magsilbing aktibidades ning Justice and Peace Desk at maging pamikatagun mu naman nung nukarin misulung ing adbokasiya.
Metung karing components ya pin ing grassroots-level awareness training. Kapamilatan ning aktibidades a ini, mibie la ding miyaliwang seminars patungkul king Bill of Rights, Rights of Women and Children, Labor Rights, at Indigenous Peoples (IP) Rights karing involved sectors. Anting pilot activity ning J&P Desk, meganap ya ing Virtual Seminar on Human Rights anyang Oktubri 29, 2022 karing ROTC students ning Angeles University Foundation, Inc. (AUF). Meging matagumpe ya iti kapamilatan ning partnership king Center for Christian Formation and Praxis na ning mesabing unibersidad. Anting kapagsadian para king mesabing seminar, meganap la ding mapilan a meetings karing program coordinators ning AUF. Kareting meetings, apikayarian la ding detalye na ning seminar – kalupa ning Human Rights General Orientation and Provisions, relevant Catholic Social Teachings, at ding miyaliwang isyu patungkul king karapatang pangtau. Para karing resource speakers, mekipag-partner ya ing SACOP king NASSA-Caritas Philippines (Development Department) at king Legal Network for Truthful Elections (LENTE). Ding meging talapag-salita ila pin di MR. EDIL GUYANO (NASSA Caritas Philippines – Development Department Head) at i ATTY. KEVIN BULOTANO (LENTE – Communications Director).
Para king daluy ning seminar, mumuna yang pisabian ing Cathoic Social Teachings (CST) a penimunan nang Mr. Guyano. Mumuna nang pelino keti ing ulaga na ning ideyang “faith that does justice” anting konteksto ban aintindyan ya ing CST. Kayari na niti, pisabian la ding bases of human dignity king konteksto na ning kasalpantayanang Katoliko at anting taung megawa king wangis na ning Ginu. Pisabian ya naman ing principle and foundation of social mission a makayamut king bie na ning Ginung HesuKristo at agpang king sitwasyun a nung nukarin tamu mabie-bie. Dening mumunang pisabian ila ring meging jumping board para king pamag-isplika nung nanu ya ing Catholic Social Teachings. At anting tauling dake na ning pamagprisinta nang Mr. Guyano, pisabian la ding ten (10) principles of CST.
Kayari na ning mumunang dake ning seminar, penimunan neng Atty. Bulotano ing kaduang dake a patungkul king Human Rights General Orientation and Provisions. Keni mumuna yang pisabian nung nanu ya ing karapatang pangtau. Kayari, mebanggit at pisabian la ding miyaliwang klase ning karapatang pangtau (sibil, pulitikal, pangkabuhayan, panlipunan, at kultural) at ding miyaliwang instrumentu nung nukarin ya makayamut ing karapatang pangtau kalupa na ning Philippine Constitution at ing Declaration na ning United Nations. Anting tauli ning dake na ning pisasabian, pekatimid nang Atty. Bulotano ing katutuan na anting tau a ating karapatan, atin ya naman obligasyun ing tau king pamanlualu at pamangalang king karapatang pangtau da ring keyang kaparang tau.
Para king tauling dake ning seminar, mika-breakout sessions la ding estudyante at midake lang pakibat karing kutang a likuan nang Mr. Guyano karela. Ding kutang ila pin ding: 1) Nanu la ring a obserbahan mung human rights violations king kekayung lugal?, at 2) Nanu la ring malyaring aksyun a gawan ban aiwasan la deti at ban isulung ing karapatang pangtau?Kayari ning mibieng oras, midake la ring pakibat at mipalino la ding aliwa pang kutang. Meyari yang matagumpe ing seminar king saup da ring dinake rang kebaluan ding tagapagsalita at king saup na ning pamakisanmetung da ring estudyante.
Tutu pin ing obra at misyun para king pamisulung king karapatang pangtau kabang bie ya at mangailangan yang oras at pagal. Inya pin ing mumunang takbang a megawa umpisa ne mu karing tutuki pang aktibidades para king adbokasiya. At anting paganaka, ing pamisulung para king hustisya at kapayapan, pamanyundu ya king misyun ning Ginung HesuKristu, ing pamanatad KANAWAN kapamilatan ning pamanlualu at pami-paulaga king dignidad at karapatan ding sablang tau.
