Manatad Kanawan, Kapanayan ing Parasan
Ing Tauli karing Atlung Kwentung SACOP Iskolar
Anyang milabas a Hunyo 27 anggang Hulyo 3, 2022, meganap ya ing Global Youth Tourism Summit king Sorrento, Italy at king mesabing pamitipun atin yang maulagang mensaheng dinake at penabilin i Papa Francisco para karing kayanakan. Bayu ne binieng Papa Francisco ing tauling bendisyun king pamitipun, nganang minapse amanu, “Dear young people, I wish you to be messengers of hope and rebirth for the future.” Tune pin na ing mensahe nang likwan makapanaun ya lalung lalu na ngening panaun a mimiral ing miyayaliwang kaligaligan king yatu kalupa na ning pandemya at giyera. Makapanaun ya naman ing mensahe para karing kayanakan king mabilug a yatu a mamarap king miyayaliwang kapagsubukan at masipit a kabilyan king bie. Makanyan mu rin, king mensahe nang likwan papasyag na ning kekatamung Santo Papa ing kapanayan na karing kayanakan at king mipnung kapanayan nala namang tutubud ban maging taga-panatad pag-asa king daratang a panaun.
Anting pamipatutu king kapanyausan na ning kekatamung Santo Papa, ing kwentu da ring kayanakan a magsumikap at ali milalako pag-asa sumangid ning kalulu at masipit dang kabilyan ilang magsilbing pakibat tamu kaniting mesabing panagkat at amun. King milabas a aduang bulan, kapamilatan ning SACOP at ning IMAB, midake la ring kwentu da ring mapilan a SACOP iskolar a meyari king pamagaral da king kolehiyu. Malugud at matula da lang dinake ding kwentu ning pamagpursigi da at peyabut ing kapasalamatan da karing sablang sinaup karela. Mananu na sanang deting kwentu mamie lang inspirasyun karing aliwa pang kayanakan a magsumikap king karelang pamagaral.
Anting tauli karing atlung kwentung SACOPIiskolar, matula at pagmaragul mi yang darake ing kwentu ng ROSE MARIE PARICO, metung a SACOP iskolar. Tubu yang San Rafael, Guagua at ibat king Parokya ning Imaculada Concepcion, Guagua. Meyari ya king kursung Bachelor of Science in Business Administration Major in Marketing (Cum Laude) king Mary, the Queen College. Miyabe ya king SEAP kanitang banuang 2018 angga na king meyari ya.
Bista man makuyad ya, masasalamin ya king kwentu nang Rose Marie ing delanan na bayu ne akamtan ing kayang pangarap – ing mayari king kolehiyu. Makanyan mu rin, payabut na ing kapasalamatan karing sablang taung meging instrumentu ning Ginu at ing paganaka na karing kalupa nang kayanakan a magsumikap. Ini ing kayang dinakeng kwentu:
“Metung kami kareng pamilyang saktu mung milalabas king patingapun. Dati yang mandukit i tatang ku at i ma ku ya naman ing malalakwan bale bang manasikasu kareng kapatad. Maranun kung memulat king kasakitan ning bie. Kaya anak ku pa mu, edad walong banwa, tutuki na kung makipamipi kang apu ku ban atin kung babakalan. Inyang tinuntung na kung high school, linub na ku man abe bale bang ali naku makidagdag pa king pamagkasakit dareng pengari ku. Kagraduate kung high school agad kung mekipagobra bang makasaup karela. Pitung banwa kung mituknang la pamagaral. King panaun ayta marirya at mipapa-isip ku bakit dening taung atin pagaral pamaglokwan da at ikaming bisa ali kami mididinan pagkakataun. At dinatang pin ing aldong ginamit yang instrumentu ing Guinu bang matupad ing malambat na nang kayadwanan ning keyang abang alipan. Meging kasangkapan ya ing meyangu na bie Among Larry Sarmiento, kura paroko mi inyang panaun a ita, na personal pang menatad kanaku ban miras kung maselese SACOP at king saup na miabe ku kareng maswerting benepisyaryu ning SACOP Educational Assistance Program o SEAP. Aku yata itang amanwan dang “Ang Babaeng Walang Pahinga.” Uling pangaras ning abak assistant kung dentista at estudyante naman pangabengi. Uli ning SEAP eku na pigaganakan nung nukarin ku manintun pamayad kada semester. Ngeni pin megbunga na, asulud kune ing matuling a toga na dating pangarapan ku mung isulud at atin pang bonus, cum laude ku. Sulit ing puyat at sakripisyu. Lubus ing kapasalamatan ku kang Among Kenneth Alde, Executive Director ning SACOP, king masanting a programang ayni misadsad ku pu king apat a banwa king college; kang Ma’am Karissa Calma, Humanitarian Service Specialist, a mamantabe kekaming iskolar at aliwa pa pung talasuyu. Sana dakal ya pa pung asopan a kayanakan a bisang mayari at midinan masanting a kinabukasan ing SACOP. At ing Diyos a mayupaya iya ng balang mablas pu kekayung talapagobra na. Katataulian, nung mangarap ka sabayan meng dapat bang iti maging ganap.”
Mayap a oras keka, Rose Marie at king kekang pamilya! Tune pin na metung kang uliran at modelu karing kalupa mung iskolar at estudyante. King kekang kwentu, pepakit mung masala na maski mituknang kang pansamantala king pamagaral pauli na ning kakaluluan, malyari pa ring misundu iti basta ali milalako ing pag-asa at ing pamagpurisigi. Pauli na ning Ginu, dirinan nakatamung dakal a pamikatagun ban akamtan tala ding kekatamung pangarap. King parewung paralan, parala ya namang tau ing Ginu ban paramdam na ing kayang lugud at pamanantabe. At kalupa ning nasa mu para king SACOP, pangaku mi na isundu mi ing kekaming misyun manatad #KANAWAN kapamilatan ning pamanantabe karing dakal pang kayanakan king karelang pamagaral.
Ing SEAP megumpisa ya inyang 1996 anting pakibat karing magaral king kolehiyo a alus magyari na dapot mituknang uli ning kasakitan ning bie dela ning pamamakbung ning Bulkan Pinatubo. Megumpisa karing 30 estudyanteng ume ng mag-graduate inyang 1996, 500 na lang estudyante ring susuportan ning SACOP ngening Academic Year 2022-2023, 40 kareni manibat ing panggastus da king Lamak ning Cruzada de Penitencia Y Caridad ning Virgen de los Remedios at Santo Cristo del Perdon (Dalo Balen at Dalo Parokya).
Inyang milabas a academic year, 218 lang iskolar ring mig-graduate, 1 a magna cum laude, 5 kareni cum laude la, mapilan naman with honors la. Marakal kareng iskolar tamu dean’s lister at president’s lister la. Marakal kareng graduates tamu board passers la at magobra na, kasalukuyang sasaup kareng pamilya ra ban maka-ulagpus king kasakitan.
Agkatan da kayu pung maging donor at benefactor ning scholarship program ning kekatamung arkidiyosesis. Maki-aduangan kayu pu king SACOP karening makatuking numeru:
Account Number: 000703-4154-58
Account Name: Social Action Center of Pampanga, Inc.
Bank/Branch: BPI – San Fernando Dolores
Account Number: 00133-0433-244
Account Name: Social Action Center of Pampanga, Inc.
Bank/Branch: BDO – Pampanga San Fernando-San Isidro
Account Number: 676-3-67603946-6
Account Name: Social Action Center of Pampanga, Inc.
Bank/Branch: Metrobank – San Fernando McArthur Highway
G-Cash Number: 0906-057-8820
Account Holder: Remedios Manalili
G-Cash Number: 0977-142-2169
Account Holder: Justin Gatus
Dakal a salamat pu. Ing Apung Ginu a panibatan ning sablang kalam at grasya ya nang balang mablas king kekayung ganaka.
