Caritas Philippines at SACOP: Integrating Compassion and Competence
(Ing Kaduang Dake king Kwentu ning Pamiyubug da ring Talasuyu da ring SACs)
Metung karing meging parti o dake na ning kursung Advanced Executive Course for the Social Action Directors and Program Coordinators kapamilatan ning Caritas Philippines Academy (CPhA) apin ing Learning Visit a meganap king SACOP. Ing karelang pamamisita makapatungkul ya king pisasabian nung makananu mitalakad at mamalakad a metung a organisadung social action center. Agpang kang Ms. Nelsie Uy, ing head ning CPhA, ing pekapaintungulan ning learning visit apin ing lawan la ding maulagang aral ibat king karanasan ning SACOP anting metung a matagumpeng SAC.
Meganap ya ing Learning Visit king SACOP anyang 16 August 2023. Malugud nalang tinggap ning apostoladu ding 37 bisita at kalahok ning mesabing kursu. Pormal yang meg-umpisa ing aktibidad kapamilatan ning metung a pamuklat a panalangin at kayari ing Welcome Message nang Fr. Justin Gatus (SACOP Assistant Director). King kayang mensahe para karing bisita at kalahok, pekatimid ng Fr. Justin ing katangian at maulagang papel ning “pamakialam” lalu na karing talasuyu da ring social action centers (SACs). Inya pin sinabi na, anting mag-obra karing service arms da ring arkidiosesis at diosesis tune pin na “mapakialam” la – na pakialaman ngan ing halus egana-gana ban misaupan la ring pakakalulu at mangailangan. Kayari nang miabie ing mensahe, kinilala da la ding sablang bisita at miprisinta ya ing schedule a penimunan nang Ms. Galla Ramos (SACOP Administrative Division Head).
Kayari na ning pamuklat a dake, genapan ne ing immersion da ring bisita at kalahok karing miyaliwang programa ning SACOP: Integrated Community Organizing (ICO), Resettlement Development Program (RDP), Housing Development Program (HDP), at Livelihood Development. Pinitna da la ring bisita at kalahok king 4 a grupo a makatutuk karing 4 a programa. Para king ICO, pisyalan at pekipagkwentuan da la ring peoples’ organizations (POs) a inorganisa at antabayan ning SACOP king Sitio San Lorenzo, Sapalibutad (Angeles City) at Northville 15 (Angeles City). Para king RDP, memasyal at pekisabian da la rin ding mapilang HOA leaders na ning Mary Land Resettlement (Sapang Biabas, Mabalacat City) a misaupan anyang panaun ning Pinatubo. Para king HDP, linawe da la ding low-cost housing a mitalakad at ing komunidad ning SACOP Benedict XVI Homes (San Pablo, Magalang). At ing tauli, para king Livelihood Development, binisita at pekipagkwentuan da la ding mapilang kliyenting misaupan kapamilatan ning loaning program.
Kabalik da at kaybat meugtu, penimunan neng Fr. Deogracias Kerr Galang ing mumunang parti ning input a makapatungkul king Historical Context and Institutionalization of SACOP. King kayang pamagdake, dininan nang pansin Fr. Deo Galang ing ulaga ning institutionalization da ring SACs kapamilatan ning pamagparehistru da king Securities and Exchange Commission (SEC). Agpang king sinabi nang Fr. Deo, maulaga ya ing institutionalization da ring SACs para king sustainability at partnership/networking. Parti na ning institutionalization apin ing pamagsadya king vision-mission-goals, articles of incorporation, policies, at procedures. At keni ya lulub naman ing ulaga ning manualization of operations and procedures. Pekatimid na deting manuals, policies, at procedures ding makasaup king pamamalakad at magsilbing tools in management.
Kayari na ning mumunang parti, pinrisinta at dinake nalang Ms. Galla Ramos ding miyaliwang programa at serbisyu ning SACOP – ding humanitarian at social development programs ning apostoladu. Kayari dang miprisinta, penimunan neng Fr. Kenneth Alde ing pamagdake king topic a Establishing a Well-Organized SAC: Structure, Leadership and Governance, Communication, Resources. Mipisabi la ding miyaliwang prinsipyo at stratehiya a maliaring gamitan king pamamalakad SACs. Mebanggit la naman ding miyaliwang yugtu (stages) a daralanan ning metung a organisasyun o institusyun. Anting panauli, dinake at dininan neng pansin Fr. Kenneth ing puntung: “Managing social action centers is a journey. What is important is we know where we are, what we have, where we want to go and how to go there. Every stage requires appropriate responses.”
Kayari da ring talakayan, mika-makuyad a open forum ban mipakibatan at midinang sala ding kutang da ring kalahok king pamitipun. Deni mipakibatan at melinawan la kapamilatan da di Fr. Kenneth at Fr. Deo. Kayari na niti, pesalamatan neng Ms. Nelsie Uy ing mabilug a apostoladu ning SACOP king pamananggap at pamamie oras ban midake beluan at karanasan a makasaup king pamitalakad at pamamalakad da ring SACs.
King mibieng makuyad a panaun para king Learning Visit, mananu na sanang megi ya iting oportunidad ban makadake yang beluan ing SACOP karing kaparang SACs nung makananung epektibu at makapanaung makibat king pamangailangan da ring pakakalulu at mangailangan kapamilatan ning organisadung pamagpatupad at pamamalakad karing programa at serbisyu ning apostoladu. Makanyan mu naman, kapamilatan na ning karanasan (first-hand experience) da kayabe ding kayantabe tamu karing komunidad, mananu na sanang meging patutu la king gagampanan nang misyun ning SACOP king arkidiyosesis at mekapamie inspirasyun karing aliwa pang talasuyu karing SACs ban misundu king pamakisanmetung king misyun ning Ginu tamung HesuKristo.
