Antabe SACOP at Parokya
Ing Pami-aduangan para karing Anak na ning Sitio Matahimik
King banuang iti, metung karing bayung komunidad a miyabe karing antabayanan na ning apostoladu ya ing Sitio Matahimik king Barangay Del Pilar, City of San Fernando. King kapamilatan na ning Parokya nang San Jose king pamanimuna nang Rev. Fr. Paul Velasco, mi-refer ya ing komunidad ban lawan at panigaralan ing masakit a sitwasyun ning komunidad at ing pakakalulung kabilyan da ring manuknangan. At kapamilatan da reti, pagkapilitang makibat king karelang pamangailangan. Karing mapilan a beses a pamagbisita da ring social workers a miyatasang tumutuk king komunidad ban pakibaluan at panigaralan ing sitwasyun, mumunang meyakit na ing kapanintunan da ring kerakalan karing manuknangan king komunidad ya pin ing pamangalakal basura. Pauli na ning makaniting klasing kapanintunan, meyakit la ring pamangailangan at problemang aldo-aldo arapan da ring manuknangan at pagkaplitang pakibatan lalu na ring makatuki: a) ing makalunus a kabilyan na ning kalusugan da ring tau lalung-lalu na karing anak, b) ing kakulangan king nutrisyun king karelang pamangan, k) ing pamangailangan para king malinis a danum, at d) ing marinat dang kapaligiran.
Karing pamamisita da ring social workers king komunidad at pamakipagkwentu karing manuknangan, akilala da la ring aduang anak a ating espesyal a pamangailangan king karelang kalusugan. Ing metung karing anak ya pin i Arjay Salvidar, anam (6) a banua. Ding pengari na, di Sara Jane Montaya at Nestor Salvidar, parewu la namang mangalakal basura. Daranas ya king sakit a cerebral palsy i Arjay. King pamakipagkwentu karing pengari na, abalu na me-admit ne i Arjay king intensive care unit (ICU) king ospital kilub na ning aduang bulan pauli na ning pamanakla at pamanyuka na. Maliban kaniti, pauli na ning sakit ng Arjay, magkasakit yang mangisnawa at magsalita, at daragul ya atyan. Pauli na ning kakulangan dang panakitan ding keyang pengari, ali da agyung makasali karing kailangang panulu, lalung -lalu na king pamangan.
Maliban kang Arjay, akilala de rin ding social workers i Rose Ann “Princess” Bo, atlung (3) bulan. Daranas ne man ing anak king sakit a hydrocephalus. King pamakipagkwentu karing pengari na, abanggit da madalas a lulual ing gatas king arung na ning anak balang dededi ya pauli ning sakit na.
Anting mumunang pakibat na ning apostoladu king pamangailan da ring anak, mi-refer at midala la ding anak king clinic na ning metung karing volunteer doctors (pediatrician) ning SACOP, i Dra. Pam Gamboa. King initial check-up at assessment a megawa karing anak, midinan lang gatas at pamangan a kailangan da ring anak a angkop king karelang kondisyun. Makanyan mu naman, midinan yang referral i Princess para king X-ray ampo CT scan ban lalung abalu nung nanu ing kayang medical condition, nanung karampatan a pamanulu at nanu klasing panulu ing kailangan na. Makanyan mu naman, ban lalu lang mipaliwanagan ding pengari na king kayang kondisyun. Dapot ali melaus iti pauli na ning mika-pneumonia ya ing anak.
Pauli na ning maselan a kondisyun da ring anak at pauli na mu naman ning espesyal dang pamangailangan, lalapit ya ing apostoladu karing taung makabuklat a pusu at karing taung atin kayatinan at kagiwan ban maki-aduangan king SACOP king pamanyaup at pamanantabe karing aduang anak.
Para karing ating kapagnasan sumaup, maki-aduangan kayu pu kekami king SACOP (+6345 649 6136); malyari kayu namang makipag-ugnayan kang Mrs. Rhodora Marie Ocampo (0997-617-5202 / 0919-294-4541).
Ing Apung Ginu a panibatan ning sablang grasya at kalam Ya na pu ing balang mablas king kekayung lugud at ganaka. Dakal pung salamat at mipapanantabe tamu.
