EPHATHA Development Center: Be Opened, Be Awakened
Empowering People by awakening Human Aspirations and Training Human Abilities. Iti ya ing kabaldugan at penibatan na ning lagyu ning EPHATHA Development Center (EDC) ning SACOP. Iti ya ing pagmaragul a development center ning apostoladu. Kapamilatan ning suporta na ning Misereor of Germany, mitalakad ya ing EDC anyang panaun kayari ning pamamakbung ning Pinatubo. King pamag-umpisa na, megsilbi ya iting training facility para king pamagyabung ning kebaluan at pamiyubug da ring kapasidad da ring peoples’ organizations (POs) a binuu, inorganisa, at inantabayan ning SACOP. Pauli na niti, ding POs megi lang kayaduangan ning SACOP king pamanimuna king restoration, rehabilitation, at social development interventions karing mesalantang komunidad. Anyang late 1990s, kayari na ning graduation da ring mesabing POs manibat king direct community development assistance, miparenta ya ing EDC anting metung a venue para karing conferences, seminars, at trainings. Kapamilatan na niti, megi ya pa ring tapat ing EDC king kayang parasan para king pamagpasikan king balang metung kapamilatan ning pamaglinang karing abilidad da ring tau ban apalual ing karelang potensyal.
King kasalukuyan, agyu na nang makipagsabayan ning EPHATHA Development Center karing miyaliwang establisyimentu pangaras karing serbisyu kalupa na ning conferencing, lodging, catering, at events celebration. Makanyan mu rin, kapamilatan ning pangarehistru na king PhilGEPS, midadake yang serbisyu karing conferencing needs da ring miyaliwang ahensya ning gobyernu. Maliban karing mesabing pamitipun, magagawa ya naman ing EDC anting venue da ring mapilang pamitipun ning kekatamung arkidiyosesis.
Para naman karing pasilidad ning EDC, atin ya ining 2 maragul a conference halls: St. Ferdinand Hall (agyung tanggap 50-70 participants) at Virgen de los Remedios Hall (maliaring pitnan king 2 halls at agyung tanggap 50-100 participants). Atin ya naman 2 board rooms a maliaring tanggap 15-25 a katau. Maliban kareti, ing Good Shepherd Hall makaparikil ya para karing mangaragul a kaganapan at pamitipun. Maliari ya naman iting pitnan king 2 halls at agyu na niting tanggap 100-500 guests. Atin ya namang lodging space a agyung tanggap 62 guests, atin ya iting twin, triple, at quartet sharing at dormitory para karing student guests. Balang kwartu atin yang aircon unit at sariling comfort room at shower room.
Anting pakibat king kapanyausan ning Laudato Si ning kekatamung Santo Papa at king prayoridad king Ecology, anyang Hunyo 2019 ginamit neng solar power para king kuryenti kapamilatan da ring milageng solar panels king pamiaduangan king WeGen Distributed Energy Philippines. Kapamilatan na niti, mebawas ing konsumu na ning kuryenti na ning EDC a makasaup ban mabawas ing carbon dioxide emissions. Iti mu rin ing pakibat ning SACOP king climate emergency.
Maliban karening mesabing pasilidad, ing tatangkilikan at babalik-balikan da ring kliyente king EDC ing manyaman a pamangan a yayapag da karing karelang bisita. At migit kareti, ing masanting a serbisyu at mapaling pamanaggap da ring staff karing bisita ing pagmaragul na ning EDC at ing lalu na pang susundu. Magpatune kanini apin ding testimonya da ring kliyenti a magpatutu king serbisyu a tinggap da. Makanyan mu naman kapamilatan da reti rerekomenda de ing EDC karing magbalak a bisita.
Makanyan mu rin, kapamilatan ning suporta da ring karelang kliyente, makapamie yang saup ing EDC karing bibitbitan ng 10 iskolar a makayabe king SEAP. At king kabuuan, kapamilatan ning lulub a panakitan ning EDC, misusundu la ring programa at serbisyu ning SACOP para karing pakakalulu. Para karing kargadagang impormasyun o reservation king EPHATHA Development Center, maliaring makipag-ugnayan: (045) 402 4278 / (0942) 715 4276 / (0975) 778 5113. Maliari ye mu namang lawan at i-visit ing opisyal Facebook Page: https://www.facebook.com/SacopEphatha.
