Catholic Social Teachings: Care for Creation
Anyang 04 Oktubri 2024, king aldo kapigaganakan ning kafiestan nang San Francisco ning Assisi, migunam la ding talapagobra ning apostoladu kapamilatan ning talk, Catholic Social Teachings: Care for Creation. Iti penimunan neng Rev. Fr. Justin G. Gatus, ing assistant director ning SACOP, at tegunan de ding 42 regular staff, 9 project staff, at 3 volunteers. Anting metung a institutional activity, banua-banua lang migugunam ding talapagobra karing Catholic Social Teachings. Dapot kaniting banua, migunam lang partikular king katuruan patungkul king Care for Creation. Meyapan yang iti ing pigunaman, pauli ning mitagun ya iti king kafiestan nang San Francisco ning Assisi, patron of ecology and animals, at makanyan mu naman pauli ning susulung ning kekatamung Santo Papa king encyclical letter nang Laudato Si.
Pormal yang meg-umpisa ing talk kayari ning First Friday Mass a penimunan nang Rev. Fr. Kenneth D. Alde, ing executive director. King pamag-umpisa ning talk, siglawayan nala pang Fr. Gatus nung nanu la ding Catholic Social Teachings (CST). Agpang kang Fr. Gatus, ding CST metung lang katipunan da ring katuruan ning Santa Iglesya, a makayamut karing Ebanghelyu at king dignidad na ning tau, a tatalake karing isyung panlipunan, pang-ekonomiya, at pampulitika. Layun da ring CST ing mantabe karing talasalpantaya a makibat karing panlipunang isyu king mitmung lugud, hustisya, at pamisasanmetung. Maulaga lang pakibaluan ding kasangkanan da ring CST: pangaku la ning katapatan king hustisya, ban mika-kamalayan karing mayna at mangailangan, responsibilidad la para king kapakanan da ring keraklan, at metung a aktibong pamakirake king kabilyan da ring aliwa.
Kayari ning mumunang dake, pisabian ne man ing patungkul king Stewardship: Care for God’s Creation. Pelino nang Fr. Gatus na ing stewardship metung yang maingat at responsableng pamangasiwa king metung a bageng mipanibala. Belikdan neng Fr. Gatus ing kwentu ning pangalalang ning yatu a nung nukarin mipanibalan ya ing taung sesen ing aliwa pang lelangan ning Ginu. Ing masalese pamanibala ning tau paralan la king pamanyundu king pamaglalang ning Ginu king yatu at paralan ya naman anting pamamie kasuyuan karing kaparang tau. Inya pin pekatimid neng Fr. Gatus ing puntung: Nung ing metung pinili nang maging disipulo nang Kristo, metung yang masalang pakibat ing maingat at responsableng pamangasiwa o stewardship.
Kayari na niti, tutuki neng dinake Fr. Gatus ing patungkul king Laudato Si at ding 7 platform goals na niti. King mesabing encyclical letter, panyaus ne ning Santo Papa ing pamaglingap king kekatamung yatu, ing kekatamung common home. Agkatan naka tamung Papa Francisco king ausan nang ecological conversion a magpaganaka na metung yang importanting sangkap ning kekatamung kasalpantayanan ing pamaglingap king meto-lelangan.
Makanyan mu naman, makapalub la king Laudato Si ding ausan tang 7 platform goals; kapamilatan ning pamagdikil ta kareti, magbungang metung a masalang kinabukasan para karing sablang manuknangan king yatu:
- Response to the Cry of the Earth- pamagprotekta king kapaligiran ban mipakibatan la ring isyu king climate change, polusyun, at biodiversity loss
- Response to the Cry of the Poor- pamakisanmetung karing mayna at pakakalulu uling ila ring mumunang miapektuan at magdusa king pangasira ning kapaligiran
- Ecological Economics- pamisulung king sistema a maging dalan king pamamie kagalangan at respeto king kapaligiran
- Adoption of Sustainable Lifestyle- pamanghikayat king sampling pamibie-bie at eco-friendly
- Ecological Education- pamnuru at pamagdake king ulaga ning pamaglingap king meto-lelangan mag-umpisa king sarili papunta karing kekatamung komunidad
- Ecological Spirituality- pamanalangin para king yatu at pamagkapilit akit ing presensiya ning Ginu king kalikasan
- Community Engagement and Participatory Action- abe-abeng pamangusal anting metung a komunidad ban makapamieng epektibung solusyon para king kapaligiran
Anting pamupus, dinake neng Fr. Gatus ing meging kwentu at sitwasyun anyang milabas a COVID19 pandemic a nung nukarin megi yang pamikatagun ban paynawa (pa-inawa) at migunam la ring tau at kasabe na niti kinayap ya ing yatu. Pepakit na ring masalang Fr. Gatus ing maulagang pami-ugne-ugne tamung tau at makanyan mu naman ing ugnayan tamu karing sablang lelangan ning Ginu.
Bilang metung a institusyun ning Pisambang Katoliku, makisanmetung ya ing SACOP king panyaus ning kekatamung Santo Papa ban lingapan ing kekatamung tuknangan (care for our common home) uling itamu ngan – tau at sablang lelangan – miugne-ugne tamu king lugud at grasya ning Ginu. Kapamilatan ning pamipalino at pamigunam king Care for Creation at antimong pakibat king kapanyausan ning Santo Papa karing balang talasalpantayang Kristiyano, magsilbi ya sa iting mumunang takbang king kapagnasan namu naman ning apostoladung gumusal at makisanmetung king kasuyuan ning Pisamban ban balikdan at lingapan ing meto-ketawan at meto-lelangan.