Ing Mayap A Balita – Amare et Servire, November 2022

Pope Francis Homes: Santungan ning Kapasnawan at Kanawan

“Love makes a house a home.” Kalupa na ning pauaga ning mesabing kasebian, tune pin ing metung a tuknangan kabud ya mu metung a istruktura o gusali. Dapot pauli na ning pamikalugud da ring mipapamilya, ing metung a tuknangan magi yang lugal nung nukarin ing balang miyembru ning pamilya panamdaman na ing kapasnawan at kapanatagan kapilubluban king balang penandit a magdatun la king karelang tuknangan. Inya pin king sumangid da ring kabalisan at kaligaligan king yatu, ing bale o tuknangan kayabe ding kapamilya, iya ing magsilbing santungan da. King kalupang paralan, mayayakit king metung ya karing pekamaulagang pamangailangan ning tau ing masaleseng bale o tuknangan. Iti mayayakit ya naman king Maslow’s Hierarchy of Needs nung nukarin makayabe ya king category ning physiological needs ning tau ing shelter.

Bista man mayayakit ya iti anting metung a maulagang pamangailangan o basic need, mayayakit karing kekatamung komunidad na manatili yang metung a problema a mangailangang kapakibatan at solusyun. King kekatamung probinsya anyang panaun a memakbung ya ing Bulkan Pinatubo, meyakit yang masipit a pamangailangan ing bale para karing pamilya pauli na ning milyaring disgrasya. Inya pin anyang panaun a ita, mitalakad la ding mapilan resettlements anting skapakibatan king mesabing problema. Dapot sumangid ning pilang dekada, manatili yang problema ing mika-disenting tuknangan. King kasalukuyan, dakal pa rin karing kabalen tamu ding makituknang mu o kaya naman manupang bale. Karening pamilyang ala pang bale, manatili yang paninap ing metung a tuknangen a asabing karela na. Anting pakibat ban makasaup king pamangailangan da ring pamilya alang sariling bale, inumpisan ne ning SACOP ing low-cost housing project. Iti metung yang paralan ban midinan lang oportunidad ding mangarap mika sariling bale. Inumpisan ne ning SACOP ing low-cost housing project king San Agustin-San Pablo, Magalang, ing SACOP Benedict XVI Homes inyang 2004; 269 na lang pamilya ring manuknangan neni karin.

Ngening banuang 2022, ban makapanatad pang KANAWAN karing dakal ta pang mangailangan a kabalen keti king probinsya, mibuklat ya ing kaduang low-cost housing project king Sitio Pipitik, Dila-Dila, Sta. Rita, ing SACOP Pope Francis Homes. Kapamilatan na ning low-cost housing project, mirinan lang pamikatagun ding low-income families ban mika-sariling bale. King proyektong ini, miririnan la namang prayoridad ding makisut mu o makituknang (house sharers) at ding manupa mung bale (renters).

Atin yang kabuuang sukad a 4-ektarya ing mesabing housing project. King kasalukuyan, 21 a bale nala ring mitalakad at malyari nang tuknangan. Para karing tutuki pang banua, misundu ing pamipatalakad karing aliwa pang bale phase by phase. Para naman king kabuuang sukad da ring bale, atin yang 32 square meters ing floor area at 100 square meters ing lot area. Makanyan mu rin, makasadya nala ding bale para king linya ning kuryenti at danum. Kalupa na ning SACOP Benedict XVI Homes, konkreto la naman ding interior roads ning housing project.

Ban pormal yang ibuklat iti, king daratang a Oktubre 13, 2022, maganap ya ing pamamendisyun karing makatalakad nang bale a panimunan ning kekatamung Arsobispo Florentino Lavarias, DD. Mekumbira la naman king mesabing pamitipun ing kura paroko ning Parokya ning Santa Rita de Cascia, Sta. Rita at ning Parokya ning Virgen de los Remedios, Dila-Dila, Sta. Rita. Makanyan mu rin mekumbira la ring mapilang opisyales ning balen Sta. Rita. Tumagun la naman king mesabing pamitipun ding talapagobra ning SACOP a manimuna king metung a tree planting activity kaibat ning pamamendisyun karing bale. King kasalukuyan, atin nang 10 bale a malyari nang i-turn over karing 10 pamilyang mipagkalaman at misaupan kapamilatan ning housing project. Inya kasabe ning pamamendisyun karing bale, ma-turn over o mibie nala naman ding bale kareting pamilya.

Para king proseso ning pamag-apply king housing project, malyari lang mamasyal at mangutang ding interesadu king opisina ning SACOP Pope Francis Homes king Sitio Pipiitk, Barangay Dila-Dila, Sta. Rita balang Huwebes nung nukarin malyari da lang akasabi ring talapagobra ning SACOP at lawen ding mesabing bale. Malyari nala mu namang makapanyad at makapag fill-up application form Karin. Karing interesadu, kailangan lang malingun at mipass ding requirements para king application. King pamagproseso ning application, magawa ya ing social investigation (SI) karing aplikante ban ma-assess la at miatyu ing profile da. Kayari na niti, mika-deliberation ya ing SACOP Housing Committee agpang king resulta ning imbestigasyun. Istung meyakit na kwalipikadu ya ing aplikante base karing nilatag ng qualification standards ning SACOP, malyari neng pisabian ing pamamayad at ing pamaglipat da king bayung bale (turnover).

Para karing interesadu karing pabale, makasulat la king makatuki ding paunang detalye. Para king pamipalino karing kutang nung sakali, makabili la naman ding contact details da ring talapagobrang malyari yu pung akutnangan.

Tara na pu at mamisita tamu SACOP Pope Francis Homes!