SACOP Retreat: “Hope does not disappoint.” (Romans 5:5)
“Almost everything will work again if you unplug it for a few minutes, including you.” Iti metung yang paganaka nang Anne Lamott patungkul king ulaga ning pamagpainawa, pamanahimik, at pamigunam. Inya pin sa, genapan ne ning SACOP ing retreat para king banuang iti (banua-banuang yang magaganap ing retreat para king espirituwal at personal a pamiyubug da ring talapagobra ning apostoladu). King banung iti, meganap ya ing retreat king St. Scholastica’s Retreat House, Baguio City anyang Mayo 20-22, 2025. Penimunan neng Reberendu Padre Alfredo Dimaano Jr., kura paroko ning Padre Pio Parish karin king Bacnar, San Carlos City, Pangasinan. Ing tema ning pamitipun: “Hope does not disappoint.” (Romans 5:5)
Maliban king metung a oportunidad ban makapagpaynawa la ring talapagobra, layun namu naman ning aktibidad ing palalaman at mibayu ing relasyun da ring talapagobra king Apung Ginu, ing minaus karela ban makisanmteung king kayang misyun. Makanyan mu rin, layun ning retreat ing magambul ing pamangilala at kapanatagan da king karelang sarili. Katatawlian, kapamilatan ning retreat, nasa na pasariwan ing karelang sariling pamibie-bie at ding bie da ring makapalibut karela.
King kilub ning atlung aldo, megsilbi la reting oportunidad ban migunam at mangadi. Mapilan a aktibidades a megawa king kilub da ring mesabing aldo apin ding pamagmisa, pamagrosaryu, pamananggap king Sacrament of Reconciliation, input sessions patungkul king pag-asa, at BEC sharing.
Meging mayan at masaya ya naman ing daluy ning retreat pauli na ning pamamiru at simpli pero malaman nang pamagdake. Ding dinake nang puntu at pamigunam Fr. Dimaano, ali la mu makatula dapot tune la ping makabaldugan at mamie inspirasyun king bie at king bokasyun ning balang metung. Mapilan karing puntu at paksang dinake ng Fr. Dimaano apin ding makatuki: Face of Hope, Jubilee 2025, First Seven Words of Easter, Eleven Laws of Lifetime Growth, Life to the Full, at People of Hope.
Ing retreat eya mu anting metung a “tuknang (pause)” king bie at obra da ring talapagobra; dapot megi yang metung a banal a oportunidad ban magbagal, makiramdam, at mibayu. Katatawlian, king panaun ning matahimik a pamagmuni-muni, matapat a pamagpakibaluan, at malalam a panalangin, ing tune kayapan manibatan ya ali king pamangalingwan king milabas dapot king pamanyundu king bie kambe ning grasya ning Ginu a mamantabe kabang dalan.
