34 Banua ning KANAWAN NING BIE
Anting metung a institusyun ning Santa Iglesya, lubus nang pagnasan ning SACOP na makilala ya ali mu anting metung a institusyun a lilingap karing pakakalulu nune makilala ya anting metung a institusyun a makipaglakbe karing pakakalulu papunta king KANAWAN NING BIE. At iti ya naman ing pane hamun da ring trustees na ampo ning kekatamung Arsobispu, ing SACOP ing maging lupa ning Ginu keti arkidiosesis.
King mitmung kapanaligan, ding programa at serbisyu na ning apostoladu ding magsilbing konkretung patutu ning lugud na ning Ginu. Makanyan mu naman, ding talasuyu ning apostoladu ding magsilbing gamat nang HesuKristo a lilingap karing mangailangan lalu na ring atsu king laylayan.
Dapot ing lalung meging hamun ngening panaun ning social media apin nung makananung dening pamikatagmu karing pakakalulu magi lang tutung karanasan ning KANAWAN NING BIE para karing parehung antabayanan at manantabe ning apostoladu.
Ding makatuki ring buud da ring planu na ning apostoladu para king banuang 2024:
- Makalikum ya ing Alay Kapwa Program a ponding mikahalagang ₱ 5M manibatan karing miyaliwang resource mobilization activities kalupa ning meplanung Radiothon a maganap king kilub ning panaun ning Kuaresma. Ding malikum a pondu magamit la karing miyaliwang humanitarian programs ning apostoladu.
- Kapamilatan ning SACOP Educational Assistance Program, 600 college students ding misaupan king karelang pamag-aral para king academic year 2024-2025.
- Kapamilatan ning Health Assistance Program, maliban karing magagawang medical missions, patient referrals karing miyaliwang health institutions, medical partnerships, magawa mu rin ing updating trainings da ring 25 CHVs.
- Makanyan mu rin king panaun ning kalamidad at ing makasirang epektu na niti kalupa ning albug, misundu ing pamamakibat kapamilatan ning Disaster Response karing lubus a miyapektuan o mirasan kayanatabe ing pamiyaduangan karing parokya.
- Kapamilatan ning Integrated Community Organizing Program, isundu ing pamaglakbe at pamantabe karing 19 a pakakalulung komunidad king danuman, karing kapatad a Ayta king kabundukan ning Porac, karing rural areas, at karing urban settlements. Para king banuang iti, mantun at mamuklat mu namang 2 pang bayung komunidad a miyantabayanan kapamilatan ning mesabing programa.
- Misundu mu naman ing pamaglakbe karing manuknangan king pabale king SACOP Benedict XVI Homes king San Pablo, Magalang; panatilyan la ding mebuung clusters at pakikuanan pang dagdagan la. Kapamilatan da dening clusters, musbung ing ugnayan at masabal karing pamikatagung kalupa ning kumustahan, BEC, at talakayan patungkul karing akakit pang pamangailangan ning komunidad. Makanyan mu rin, pakikuanan ding lalu pang pasiknangan ing homeowners association at pasulungan ing pamanimuna da ring mamuntukan. King kabilang banda, para king Pope Francis Homes king Dila-dila, Sta. Rita, pakikuanang magawa la ding family profile da ring 20 homeowners.
- Kapamilatan ning Resettlement Development Program, misundu ing pamanantabe at pamaglakbe karing survivors ning Mt. Pinatubo eruption a maratun karing 5 resettlement communities. King banuang iti, pakikuanang misaupan la ring 57 welfare families king Promised Land, Mary Land at Wenceslao Village. Makanyan mu rin, pakikuanan dang makapag-graduate nala king direct CO assistance ing Buensuceso Ville and Villa Arenas. Pakikuanang manatili at mamuu pang clusters. Kapamilatan da ring kumustahan at BEC karening clusters, musbung ing matibe ugnayan, kapagmalasikatan, at malalam a kasalpantayanan.
- Para king Livelihood Development, misundu ing kasaupan karing small and medium entrepreneurs a mangailangan karagdagang kapital kapamilatan ning microfinancing. Makasaup ya iti pauli na ning mayan a loaning scheme, mababang interest rates, at mabilis a loan processing. Midake ya naman karagdagan saup karing kliyenti kapamilatan ning legal documentation, waived penalties at registration fees para karing small loans, reduced loan requirements, at welfare assistance (medical at emergency relief).
- Para king EPHATHA Development Center, ibalik na ing full operation na ning center kapamilatan ning pamamie masanting a serbisyu karing dati at bayung kliyenti. Anting karagdagang saup, mantabe ya naman karing 15 scholars a antabayanan ning SEAP. Pakikuanan na naming palual bayung set ning menu at meal packages.
- Isundu na rin ning Mayap Ya Ing Dios / PANULU ing pamamisaling mura at dekalidad a panulu at pamiaduangan karing dating kliyenti – 10 drugstores, 12 barangay RHUs, 6 GOs/LGUs, 1 private corporation, 1 FB BNB, 1 parish, 4 resellers, at ing SACOP Botika. Ban dakal la pa ding ayabut at asaupan, pakikuanang makiaduangan karing karagdagang 10 drugstores, 8 barangay RHUs, 2 LGUs, 4 resellers, 2 private offices, at 4 parishes. Pakikuanan mu namang sumaup karing 4 a pasyenti ibat king mepiling barangay kapamilatan ning libring panulu.
Ing SACOP Caritas apin ing social service arm ning Arkidiyosesis ning San Fernando, Pampanga. Anting pakibat karing miyayaliwang pamangailangan da ring pakakalulu keti probinsya, atin yang miyayaliwang programa a makaparikil king humanitarian assistance at social development interventions. Ing institusyun panimunan de di Rev. Fr. Kenneth D. Alde, executive director, at Rev. Fr. Justin G. Gatus, assistant director. At ban epektibu lang mipatupad ding programa at serbisyu, atin yang 42 regular staff a masigasig a gugusal ban miyatad ing KANAWAN NING BIE lalung lalu na karing pakakalulu at mangailangan keti Pampanga.
