Ing Pamaglingap karing Aliwa, Metung yang Daun para king Kapara
“Masabal Ning Ginu, Idake Tamu!”
Alay Kapwa Lenten Recollection and Orientation
Anyang ika-29 ning Marso 2025, meganap ya ing Alay Kapwa Lenten Recollection at Reorientation a mika-temang, “Masabal Ning Ginu, Idake Tamu.” Iting aktibidad penimunan neng Rev. Fr. Justin G. Gatus anting pamamie puge king ika-50 banuang selebrasyun ning Alay Kapwa king Pilipinas. Para king aktibidad, mekumbira la ring coordinators at volunteers ibat karing 12 a vicariates king kekatamung arkidiyosesis. Layun ning pamitipun ing makapigunam la ding Alay Kapwa coordinators at volunteers ngening panaun ning Kuaresma kapamilatan ning pamag-Alay Kapwa.
Mumuna, inumpisan neng Among Justin ing talk kapamiltan ning amanung “MASABAL” ibat king uyat ng amanung “sabal” a mangabaldugang “suya” o “masusuya.” Ya pin ing parating mumudyuk kekatamu king pamagpakumbaba at pamaglapit tamu a bubunga ning lugud karing kaparang tau. King kayang malalam a pamagpalino, keni lulto ing kekatamung lingap at pakamal karing kapara “Kapwa.” Makanyan neng pasibayu peganakang Among Justin nung nanu ya ing ALAY KAPWA o “Daun Kaparang Tau.” Ing Alay Kapwa ngana ya pin ing daun ning sikakatau nung nanu man ing atsu kekatamu panaun ya ma iti, kagiwan at kayatinan tamu lalu na para karing kalulu at mipagkaitan king bie. Ing Alay Kapwa metung yang programa ning CBCP anting metung a evangelization at resource mobilization king panaun ning kuaresma kapamilatan ning NASSA/Caritas Philippines. Digdag na pang Among Justin nung makananu neng dininan kabaldugan Apung Dong Lavarias ing “KAPARA” (KAPWA) anyang biklat ne ing mumunang episode ning Alay Kapwa Radiothon a mipamagatang, “Ninung Kapara kung Tau?” Ngana, lulto ya ing kabaldugan ning kapara (kapwa) potang atin taung pa-para king pamaglakad tamu, neng kayi nganan atin pumara kekatamu ban keta dinan tayang panaun ing tuknang ta pa, makiramdam at buklat ing sarili tamu para karing aliwa. Binie nalang Among Justin ding 3s a paganaka yapin ing: STOP, SEE, at SHARE. Ing tuknang tamu para karela, lawen la anting makisanmetung karela at kaniti lumual king sarili ing dumake tamu para karela anting kapara (kapwa).
Kadwa, iting panagkat metung yang dalan ban ibaba ing programa ning Alay Kapwa, lalam ning Humanitarian Services Program at iti dininan neng pamipalinong Mrs. Rhodora Marie Ocampo (Community Building Services Unit Head) tungkul king roles at responsibilities da ring Alay Kapwa coordinators at volunteers da ring miyayaliwang parokya. Sinambitla mu naman ding sangkan nung bakit meyaus la king pamitipun ban ila mismu mumuna lang miyubug king espirituwal at lubus aintindyan ing parasan ning Alay Kapwa. Binie nala naman at pepalino ing tungkul king ustung agus ning koordinasyun ning SACOP at ding parokya ban maging dalan la king mas mayan a komunikasyun at partisipasyun pababa karing parokya at maging karing komunidad. Iti para king epektibung PAMANATAD KANAWAN karela. – Angelita H. Domingo (Coordinator, Alay Kapwa Program)
