Manatad Kanauan, Ikang Mipanuanan!
Ing Alay Kapwa Radiothon
Kanitang milabas a ika 26 ning Marso ning banuang 2022, aldo Sabado, meganap ya ing ALAY KAPWA RADIOTHON a mika-temang, “Manatad Kanauan, Ikang Mipanuanan”. Iting meganap a radiothon, metung yang evangelization and resource mobilization program ning Alay Kapwa nung nokarin mipalalam ya ing kabaldugan ning pamirakayanan at pamamie king sarili lalung lalu na anyang milabas a panaun ning Kuwaresma at Maleldo. Ing tema ning radiothon a mepili ibat ya king tema ning Alay Kapwa ngening 2022, GIFTED TO GIVE. At ining tema paganaka ne kekatamu ing tema ning Archdiocesan Integrated Pastoral Planning V, ing keyaus at panagkat anting metung a Arkidiosesis a manatad kanauan itamung mipanuanan.
Kaniti la dinurut ding miyayaliwang dake ning kekatamung Radiothon a penimunan na ning Santa Misa kayabe ing kekatamung Arzobispo Emerito, Lubus Kagalang-galang Paciano B. Aniceto, D.D. abe ing Executive Director ning Social Action Center of Pampanga, y Among Kenneth D. Alde at ing Assistant Director, I Rev. Justin Gatus. Tinuki kaniti apin ing pamagbalik king Amanu ning Ginu kapamilatan ning pamipalalam ning Scriptural Basis ning Alay Kapwa, abe y Among Jess Layug, ing Director ning Archdiocesan Commission on the Biblical Apostolate.
Kaybat, miabe-abe la ring mengalabasan a director ning SACOP via Zoom, umpisa kang Among Ed Panlilio, Among Deo Galang, at I Among Kiko Dizon, V.G. at belikan da la ring karanasan da king SACOP at Alay Kapwa. Kayari na niti, meging guest ya naman ing Executive Secretary ning CBCP/NASSA-Caritas, y Rev. Fr. Antonio E. Labiao, Jr., at minie yang updates king Alay Kapwa libutad man ning Pandemia. Pemasalan na munaman Fr. Tony ing obra at kasuyuan ning NASSA-Caritas Filipinas at ding miyayaliwang programa na niti. Anyang pagtuan, akilala ta la naman ding meging scholars na ning SACOP kapamilatan ning Alay Kapwa, I Ms. Chin Chin Nuguid, metung a journalist ning Radio Station ning Archdiocese, ing DWBL 91.9 Bright FM; Ms. Melanie Ayson, metung a talaturu king Porac Model Community High School, at y Mr. Gilbert Torres, metung a accountant king Panorama Business and Financial.
Kayari na niti, dimdam tala naman di Among Bong Feliciano at metung karing kayang kaparokya nung makananung mekasaup ya ing Alay Kapwa karela, at ila naman, susundu da ing pamagsuporta at pamanyaup kaniti king SACOP. Akilala ta la naman ding miyayaliwang benefactors ning Alay Kapwa— Mr. Lito Lansangan, Ms. Paulette Tioleco, Dr. Marie Manalo, at dinake da ing karelang inspirasyun at kagiwan ban sumaup at midake kanauan. At katataulian, dimdam tala naman ding miyayaliwang obra, programa, at serbisyu ning SACOP king pamanatad kanawan—abe di Ms. Galla Ramos, Ms. Lani Dizon, Ms. Deuvie Laxa, Ms. Remedios Padasas, at y Mr. Lyndon Anthony Dizon. Meramdam la naman ding miyayaliwang mensahe da ring obispos tamu, abe y Most. Rev. Pablo Virgilio David, Most Rev. Jose Collin Bagaforo, at y Most Rev. Florentino G. Lavarias D.D., patungkul king Alay Kapwa. Mepupus ya ing programa kaybat da lang pigunaman at binie di Among Kenneth at Rev. Justin ding take-aways at learnings king Alay Kapwa Radiothon.
Karing anggang sinaup, mepagal, at midake king karelang kayatinan at oras, babie na kekayu ning Social Action Center of Pampanga ing maragul at taus pusung pasasalamat king tagumpe ning Alay Kapwa Radiothon! King milabas a Radiothon, penamdaman tamu a mabie ya ing diwa ning tema tamung Manatad Kanauan, Ikang Mipanuanan. Mananu na sanang, isundu tayang biayan ing diwa ning Alay Kapwa at ipagpatuluy tamu ing pamandake karing kekatamung talentu, oras, panaun, regalu, at kayatinan karing kapara tamung tau lalung lalu na karing pakakalulu at mangailangan.
