Pigagap Paintungul king Pangarap
Ing Mumuna karing Atlung Kwentung SACOP Iskolar
King balang pamilya, tune pin na metung karing tagimpan da ing maging matagumpe la ring anak king karelang pamibie-bie. Karing balang pengari, tune pin na metung karing pangarap da para karing anak da ing apayari da la king karelang pamagaral. Dapot king kamatutuanan, ali malagua at dakal a kasakitan ing kailangang lagpasan ban aparasan ing tagimpan at pangarap a ini. Metung ne ing kalulung kabilyan ing minsan o madalas a maging sumbagal ban e misundu ing pamagaral ampong mayari king kolehiyu ing anak. Inya pin sa ding pengari gawan da ngan ing egana-ganang sakripisyu ban apayari la ring karelang anak. King sumangid a banda, aliwa mu ring pengari ring magsakripisyu nune pati na rin ding anak a magsumikap ban makayari la king karelang pamagaral. Ing meging pamagbayu king setting (distance learning) na ning pamagaral pauli na ning pandemya megi ya namang kapagsubukan karing estudyante. Dapot sumangid da rening amun, ing pamagsumikap, pamagtiyaga, at kasalpantayanan da king Ginu ding pengari ampo estudyante ing meging susi ban apakiabutan da ing karelang pangarap.
Maliban karing pamilya at estudyante a matagumpeng meyari king kolehiyo, ing pamilya ning SACOP metung ya naman karing matula king pangayari da king pamagaral da ring kayanakan a kekaming antabayanan. King makanyang paralan, ila na mu rin ding tagimpan ning SACOP ampo metung karing sangkan na ning institusyun ban isundu ing keyang misyun. Metung karing kayanakan a antabayanan ning SACOP a meyari kapilan pa king keyang pamagaral apin i Scylla Ericka Santos, a tubu king Sto. Domingo, Mexico, ibat king Parokya nang Santo Domingo de Guzman. Meyari ya king kursung Bachelor of Arts in Communication (Cum Laude) king University of the Assumption. Miyabe ya anting SEAP scholar anyang banuang 2018 angga na king mayari ya king kolehiyo.
Lalapo king pusu na ing tula ampong kapasalamatan king Ginu king kalam a tinggap na. Inya pin, dadake ne ing kwentu ning kayang pamagsumikap at mensahe ning kapasalamatan karing anggang sinaup kaya king pamagaral:
“Aku pu i Scylla Ericka Santos. Metung ku pu karing SEAP scholars menibat king University of the Assumption, king kursung Bachelor of Arts in Communication. Manibat 1st Year College, sese naku pu ning SEAP. Anggang 4th year college, ila pu ing menantabe king kanakung pamagaral. Marakal na pung pagsubuk ing pegdalanan ku. Marakal nang pagsubuk ing kakung erapan – pagsubuk na iyang meging sangkan para mas sikan ku pa lub at megpatatag king kakung pananampalataya king Diyos.
Simpli yamu pu ing kakung pamilya. Eku man pu asabi na blessed ku pu financially, pero apagmaragul ku pu na sobrang blessed ku pu king kakung pamilya. Ing kakung pamilya ing meging pundasyun ku king kakung biye, lalu na king kakung pamagaral. Istung daratang pu kaku ing point na kukutang ku pu king sarili ku kung agyu ku pa ba: agyu ku pa ba ing problema na pagdalanan ku? Ing atsu mu pu king isip ku, ing kakung pamilya. Masakit ing biye? King pamilya ku kukumang sikan. Makapagal ba ing pamagaral? King pamilya ku kukwang paynawa. Agyu ku ba? Agyuan ku para karela. Alang problema na ali ku alampasan uling ila ing kakung sikan at paynawa.
Anyang Senior High School ku pu, karin ya memulat ing kanakung mata at isipan king kasakitan ning biye. 2018 anyang mediagnose ya pu ing kakung tatang king Coronary Artery disease, na meging sangkan king pangalako na king obra. Apin na pu siguru ita ing meging maragul a pagsubuk king kakung biye lalu na pu king kakung pamagaral uling iya pu ing susustentu king kekaming pamilya. Manibat pu kanita, liban ku pu ing pamag summer job para a sustentuan ku pu ing kakung pangagailangan para king kakung pamagaral king college. Meg-apply ku pu kareng aliwa-liwang scholarship banta makapagpatuluy kupu king pamagaral. Karin kupu meging parti ning pamilya ning SEAP Scholars.
Kalupa na pu ning aliwang problema na pegdalanan ku, meging tete yapung pasibayu ing Guinu para alagpasan ke at ilapit naku karing tau na makabuklat pusu para sumaup king kalupa kung bisang mayari pamagaral. King kilub ning apat a banwa, eya pu sinawang sinaup ing SEAP kanaku. Iya pu ing tinalakad na pangadwang pamilya ku uling peramdam da pu ing suporta at lugud para karing kalupa kung marakal pangarap king biye.
Meg graduate ku pung Cum Laude, at buung lub ku pung pagmaragul na bunga naku pu ning SEAP na alang sawang sasaup kareng kalupa kung estudyanti na palaging maka antabe at maka suporta king gulut ku. Ing parangal pu na ini ay para ya king kakung pamilya, king SEAP, at king Diyos na meging sandalan ku ali mu king bawat pagsubuk, bagkus pati na rin king saya ning kakung biye bilang mag-aral.
Tune yang maganaka ing Guinu. Tune yang malugud ing kakung pamilya. Tune yang sasaup ing SEAP. Uling nung ali para karela, ala ku king lugar kung ayni na alang sawang pasalamat king pagal, sakit, at sakripisyu na gewa da para kaku.
Balu ku pu na marakal yapa asopan ing SAEP. Marakal yapa adinan pagkakataun na pasibayung midinan pangarap ring estudyanti na bisang makayari pamagaral. Marakal yapang estudyanti na maging pride at apagmaragul da na apayari da la. Uling balu ku, marakal pang kayanakan ing kalupa ku na bisang atupad ing pangarap king biye at ibalik ing egana-ganang sakripisyu, pagal, at blessings karing taung meging sikan da king panaun na ala nang sangkan para tikdo lang pasibayu. At metung ku karing tau na manaya at makasubaybay na ayabut da reng kayanakan ing nanu man ing pangarapan da. Ditak pa – ditak pang tyaga, ditak pang tiis, ditak pang pananampalataya, sabe sabe tamung rin mikit-ikit king kekatamung kanya-kanyang destinasyun. Ditak namu, mayari tamu rin. Alampasan taya rin basta ali tamu mawawalan tiwala at pananampalataya.
Maragul ku pasasalamat king Guinu, uling king kabila ning problema at kasakitan, iya ing kakung meging sandalan. Enaku peburen, enaku likwan; iyang menantabe kaku para pasibayung talakad at arapan ing biye.”
Ibat king mabilug nang pamilya ning SACOP, ipayabut mi ing mayap a kaorasan keka, Scylla Ericka, ampo king kekang pamilya! Ing kekang inspirasyun ing mamie sikanan at tetagan king SACOP ban isundu ing misyun king pamagdalang KANAWAN karing aliwa pa lalung lalu na karing mangailangan ampong pakakalulu keti arkidiyosesis.
