SACOP @ 35: A Journey Full of Life
Nanu ya ing metung a pamaglakbeng mitmung bie (“journey full of life”)? Iti ali ya mu tungkul king darasan a destinasyun; nune tungkul ya iti karing karanasan at pamaglabung ning pangatau king kilub ning panaun ning pamaglakbe. Ing bie samut ya kanawan at kasakitan – ding sangkap a mumubug king pangatau tamu. Ing balang takbang mituturu yang bayu king kekatamung sarili, karing kaparang tau, at king komunidad a kekatamung pakasautan. Ing pekapusu ning pamaglakbeng iti apin ing presensiya – ing mabibie king kasalukuyan at pamanintun kabaldugan karing mangalati at mangaragul a bage. King prosesong iti, mas lalalam ing karanasan king bie at lalabung ing beluan at pangatau.
King metung a organisasyun, ing pamaglakbeng mitmung bie masusukad ya ali mu karing apagobran na na; nune karing karanasan na kayantabe karing taung kayang antabayanan. Ing dedikasyun da ring talapagobra at kapagsubukan a erapan na ning apostoladu apin ding sangkap a megpatibe at miras king nanu mang kabilyan na king kasalukuyan. Kalupa ning metung a tau, ing metung a organisasyun daralan ya naman karing ausan “ups and down”. King kayang pamaglakbe, mabibiasa ibat karing kapagsubukan at pagkapilitang sumulung pa.
Anyang 25 Abril 2025, sinelebra ne ning SACOP ing kayang ika-35 anibersaryu ning pangatatag. Ing kaganapang iti ali ya mu anting kapagmasusian ning milabas a panaun, nune pagmasusian ya meging makabaldugan pamaglakbe ning SACOP manibat anyang 1970s. Ing selebrasyung iti, magsilbi ya antimong pamikatagun ban pigunaman ing dedikasyun at katapatan king misyun ning apostoladu. Makanyan mu naman, gaganakan la naman ding tau akayabe anting talasuyu king ubasan ning Ginu karing mengalabas a panaun. Kabang parangalan ing milabas, susulung tamu king bukas a mitmung sigasig at katapatan king kayausan.
Ing mesabing pamitipun, megmula ya king metung a programa a nung nukarin miparangalan la ding mapilang empleyadu kapamilatan ning Service Achievement Award. King gatpanapun, misundu ya ing selebrasyun kapamilitan ning metung a Santa Misa a penimunan ning kekatamung Arsobispo. Mekumbira mu naman king pamagpasalamat ding miyaliwang donors ning SACOP. King homilya na ning Arsobispo, likwan ne iting kutang ban pigunaman: “Makananu ku penamdaman ing kanwan king SACOP (anting talasuyu at tinanggap king grasya ning kasaupan at kasuyuan)?” Kayari ning Santa Misa, migawad la ding parangal karing mepiling donors (individuals at corporations).
Tune pin megi yang makabaldugan ing mesabing pamitipun. Kapamilatan ning selebrasyun, pasalamat ya ing apostoladu king milabas a 35 banuang pamaglakbeng mitmung bie. Meyakit mu naman ing malalam pamagkapilit ning SACOP a maging tapat king kayang vision-mission. Kaniting pamagmasusi king Jubilee Year of Hope, pagkapilitan nang isundu ning SACOP, king mitmung kapanayan, ing PAMANATAD KANAWAN karing pakakalulu at mangailangan. –Shaina Mae H. Gutas, Technical Specialist
