Passion: Pass It On
Parte na ning daralanan ning metung a organisasyun ing atin mamako talapagobra. Dapot king pamaglako ning metung, atin naman daratang a bayu. Ing SACOP anting metung a institusyun, daralan ya naman king kaniting phase a nung nukarin ating mamako kaybat ning makabang panaun ning pamagserbisyu. Dapot king lugud ning Ginu, padala yang bayung makiagum king misyun a inumpisan ning Ginu tamung HesuKristo.
Metung karing sinuyu king makabang panaun king apostoladu apin i Ms. Galla N. Ramos ibat king Parokya nang Sto. Domingo, Sto. Domingo, Mexico. King kilub ning 35 banuang, binie neng Ms. Ramos ing kayang sarili at kagiwan ban midake kasaupan karing pakakalulu at mangailangan.
King pamag-obra na king apostoladu, metung ya karing tuturing a pioneers ning SACOP a meg-umpisa king pamakiagum king misyun anyang panaun na pa anyang mamakbung ya ing Pinatubo. Metung ya karing mumunang midake kasaupan lalung lalu na karing biktima ning pamamakbung ning Pinatubo. Agpang king maralas nang dadake Fr. Deogracias Kerr Galang, metung karing dating directors ning SACOP, maragul ing meging papel nang Ms. Ramos king resource mobilization kapamilatan ning pamangawang project proposals a padala karing miyaliwang international funding organizations ban manyaud saup a gamitan ning SACOP kanitang panaun a ita para pamanyaup karing biktima ning kalamidad.
Maliban kaniti, maragul ya naman dinake i Ms. Galla Ramos king Administrative Division ning SACOP anting Head na niti. Meging konkretu la ding pastoral priorities ning SACOP kapamilatan da ring me-implementang programa at serbisyu. Partikular kaniti apin ing sistematikung pamagplanu at epektibung pamag-implementa karing programa at polisiya ning apostoladu. Makanyan mu naman, megsilbing yang Corporate Secretary para king Board of Trustees ning SACOP. Opisyal yang meko king apostoladu i Ms. Galla Ramos pauli na ning kailangan na nang magretiru king edad a 60, alinsunud king polisiya.
King pamaglako nang Ms. Ramos, apin naman ing pamitubud nang Rev. Christian Kierr G. Tallorin anting Administrative Officer ning SACOP. Kayabe ya karing seminaristang miyordinan anting diakono I Rev. Tallorin anyang Disyembri 12, 2024 king Mother of Good Counsel Seminary. Meging epektibu ya ing pangatabud na king kayang assignment anyang Disyembri 14, 2024. Parte ning maging gampanan nang obra apin ing melakwang obra king Administrative Division.
Ali ya bayu kang Rev. CK Tallorin ing obrang gagampanan ning SACOP pauli ning miabieng oportunidad karela kapamilatan ning SACOP Learning Institute. Anyang Hulyo 2024, kayabe da ring kayang kaklaseng seminarista kanita, kinua de ing Course Orientation on Pastoral Integrated Community Organizing for Seminarians (COPICOS). Kayari na niti, dinalan la naman pasibayung aduang dominggung exposure karing miyaliwang programa ning SACOP. Mekiabe la king gagawang aldo-aldong pag-obran da ring miyaliwang staff at fieldworkers ning apostoladu.
Sumangid ning retirement nang Ms. Galla Ramos, misundu pa rin naman ing pamaki-aduangan ning SACOP kaya ban magkonsulta at pasaup karing miyaliwa pang planu at kimutan ning organisasyun para karing sasaupan na karing daratang pang panaun. Makanyan mu naman, king mitmung kapasalamatan neng tatanggapan i Rev. Christian Kierr Tallorin. At katataulian, mitmung kasalpantayanan yang maniwala ing SACOP a ali ya tutuknang mamaus at padalang talapagobra ing Ginu ban makiagum king misyun a inumpisan ning Ginung HesuKristo – ing misyun ning PAMANATAD KANAWAN karing kapatad tamung mangailangan at pakakalulu.
