Abe-abe at Sabe-sabe king Pamakirake king Misyun ning Ginu
Ing SACOP, anting metung a non-governmental organization (NGO), paniwalan nang mas maging epektibo at mas dakal la pa ring kliyenting ayabutan at asaupan na kapamilatan ning pamaki-aduangan karing miyaliwang institusyun at organisasyun. Ding mesabing institusyun a lalapitan, paniwalan da mu naman na kalupa ning SACOP ing parewung misyun at kapagnasan ing karelang susulung – iya pin ing pamidake kasaupan karing pakakalulu. Kapagnasan na naman ning mesabing pamaki-aduangan karing ausan nang “partner institutions” ing sabe-sabe o miyagnan a pamanyulung at pamaglabung. Kabang dalan, pagnasan namu naman ing organisadung paralan a pamanantabe karing sasaupan.
Para king SACOP Educational Assistance Program (SEAP), agpang king planung makalatag balang banua, pagnasan ng maki-aduangan karing institusyun lalung lalu na karing eskwela, kolehiyo at unibersidad. Karing mabubuung pamiaduangan kareti, layun ing makasaup karing kayanakan ban: Mumuna, misundu ing pamag-aral ding estudyante bista man pakakalulu ing karelang kabilyan. Kadwa, midinan lang masanting a paintungulan ban makasaup karing karelang pamilya. King kasalukuyan, mapilan karing institusyun a nung nukarin mekapagtatag neng pamiaduangan ing SACOP: St. Nicolas College of Business and Technology (CSFP), Pampanga Colleges (Macabebe), Holy Cross College (Sta. Ana), at Mary, the Queen College (Guagua). Karing mesabing institusyun, mididinan lang tuition fee discounts ding partikular a bilang ding estudyanteng ni-refer ning SACOP.
Anyang milabas a Hulyo, mitatag ya ing bayung pami-aduangan king Mary, Our Help Technical Institute for Women (Pampanga), Inc. para king karelang Unified TVET Program Registration and Accreditation System (UTPRAS). Ing programa makarehistru ya king Technical Education and Skills Development Authority (TESDA). King mesabing program, mialuk at mituru ya karing interesadung estudyante ding makatuki: Electronics Product Assembly and Servicing NCII, Industrial Electronics, at Bookkeeping NCIII. Ban pormal yang mitatag ing pamiaduangan, anyang 04 Hulyo 2024, mekipag-ugnayan la ding humanitarian service specialists a makatutuk king SEAP kapamilatan ning meganap a school visit at meeting kayabe nang Sr. Veny Casala, ing mangasiwa king programa.
Kayari ning pamanintun at pamamili karing antabayanang kayanakan ning apostoladu, meyakit ya i Sarah Nicole B. Montoya a menibat king Sitio Matahamik, Del Pilar, CSFP, metung a asistyang komunidad ning SACOP lalam ning programang Integrated Community Organizing (ICO). Ibat ya king metung a pakakalulung pamilya i Nicole a nung nukarin pamangalakal basura ing karelang peka-kabiayan. Anyang iyaluk de kang Nicole ing programa, saktu yang mayayari king kayang pamagaral king junior high school. Pauli ning karelang pakakalulung kabilyan, babalakan na namu ning pengari nang makyasawa ne mu ing anak. Dapot malino at pursigidu ya ing kapagnasan nang Nicole ban isundu ing kayang pamagaral a meging masalang sangkan ban pilinan ya king programa ning partner school.
Dapot anyang ilub da ne sana ing anak king UTPRAS abalu da ring humanitarian service specialists na me cut-off nala, inya pin ali ne malyari i Nicole king mesabing programa. Sumangid na niti, king kapagnasan namu naman ning partner school na asaupan ing anak ban asundu na ing kayang pamagaral, inaluk de kaya ing Basic Education Program a nung nukarin pantun deng sponsor ing anak ban isundu na ing kayang senior high school. Kayari ning kayang senior high school, malyari ne pa ring isundu ing UTPRAS. Anting parti na ning kayang scholarship program, kailangan nang mag-maintain a gradu. At uling scholar ya, midinan ya naman pribilehiyu a magdatun ya king dormitoryu na ning eskwela kabang mag-aral ya.
