Miyatarang Kanawan, Manatad na ngening Kanawan
Agpang king Vision-Mission statement ning SACOP, masala at malino lang masasambitla ring misyun ning apostoladu: pasiknangan la ring indibiduwal (to empower people), magorganisang Kristiyanung komunidad (to organize Christian communites), at makibat karing daying da ring pakakalulu (to respond to the cries of the poor). Inya pin sa kapamilatan ning Integrated Community Organizing (ICO) Program, misasaupan la ding pakakalulu at mangailangang komunidad king pamag-organisang peoples’ organizations. At ding miyembru da ring mesabing organisasyun mipapasiknangan la kapamilatan da ring miyayabie at mituturung capability building and development trainings a makasaup king pamiyubug at pamaglabung ning karelang sarili anting metung a tau, anting miyembru ning komunidad o organisasyun, at ing pekamaulaga anting metung a Katolikong talasalpantaya.
Maliban kaniti, ing metung a parasan ning misyung pasiknangan ding komunidad at ding miyembru apin ing: ban deting mipasiknangan komunidad at indibiduwal maging instrumentu la king pamagpasikan karing aliwang kaparang tau – ban idake ing grasyang mipagkalub karela karing aliwang pang mangailangan at pakakalulu.
Metung a patutu king ing mesabing misyun ning apostoladu ing meging karanasan nang Ms. Angelita Domingo, metung a miyantabayanan anting lider ning Sama-Samang Pagkakaisa ng Mamamayan ng Culubong, Inc. (SPMCI), metung karing antabayanang komunidad ning SACOP at anting Community Organizing Volunteer (COV) ning SACOP. Ngeni, king kayang sipagan at pamagsumikap, meging parti ne ning pamilya ning SACOP king pamanatad KANAWAN anting bayung Resource Mobilization Coordinator ning Alay Kapwa (AK) Program. Ini ing kayang kwentu:
“Yaku pu i Sis Angelita Hilario-Domingo, atin asawa, kasal kang Junior Flores-Domingo. Mipagkaluban 4 a lalaking anak, Kim Wendell, King Waren, Ricardo III, at Regino. Atin simpli at masayang pamilya. Metung a LECCOM king kilub ning maygit 15 banua. King milabas a mapilang banua, megi kung vice president at officer-in-charge king Nuestra Señora de Candelaria Chapel ning Sitio Culubong. Manibat 2019 anggang 2023, megi kung chairwoman ning Sama-Samang Pagkakaisa ng Mamamayan ng Culubong, Inc. (SPMCI), metung a grupung antabayanan ning SACOP kapamilatan ning Integrated Community Organizing (ICO) Program. Kasalukuyan kung mitalagang assistant secretary ning PPC ning Parokya nang San Matias Apostol. Dati ku namang identified leader karing public servants king balen mi.
Ing karanasan ku anyang pamuntukan ke ing SPMCI binang e malagwa. Pablasang sinadya ke ing sarili ku para karela king paralan nung makananung maging mayap at epektibung lider da king kapamilatan na ning pialimbawanan a dapat, asal, pangatau, atin katapatan, atin mayap a relasyun karelang pabal king pante-pante paralan at atin takut king Dios. Bilang metung a lider, papakit at paramdam karela ing atin lang ulaga at dignidad pangatau. Makasadyang makiramdaman king balang metung.
Ing karanasan ku naman anyang COV trainee ku, semantalanan ku ing pamikatagun a ini a babie ng training ning SACOP king libring paralan. Tinggap ku ing dadala ng beluan at kabiasnan a nung nu ku panwalan na datang ing aldo agamit ku iting pegaralan antimong pegaralan na ning metung a social worker king kilub ning apat a banua. Eku pesayangnan at dininan ku talagang ulaga iti pablasang libri ing training at kapaki-pakinabang. Ikit ku ing pamagpagal ning SACOP, bayu at panaun ning pandemya pa, ban pakikuanan ibie ing COV training.
Bilang kayabe at miyembru da ring parish leaders, babie ing oras king kasuyuan keyaus. Babie ing katapatan king pengaku. Parating panikuanan at didinan oras ing pamiaduangan. Makisanmetung king parokya king ikasulung at ikakayap ning kasalpantayanang sisesen king komunidad.
Ing karanasan ku naman king SACOP, ali ku asahang midinan pamikatagun ban makasuyu king apostoladu. Masaya, matula, at galak inyang metanggap ku. Karin ku apigunaman itang asambitla kung datang ing panaun agamit ku itang training, milyari pin.
Kanyaman a karanasan! Matulang pibulayan na dati mung miyembru ning SPMCI at meging lider, at ngeni metung nang susuyu king Arkidiyosesis kapamilatan ning SACOP. Lakwas meging ganap ing tula pauli ning tiwala ning SACOP kanaku anting Resource Mobilization Coordinator ning Alay Kapwa Program.”
King kayang karanasan, ini ing kayang meging pamigunam:
“King karanasan ku, mumuna, ing pamumuno o pamamahala ali ya iti tungkul king posisyun o kasikatan nune tungkul ya iti king pamag-impluwensya, magpasikan, magserbisyu king ikakayap ning ketawan. Mag-impluwensyang mayap karing aliwa. Kadwa, parating iyabe ing suyu at sakripisyu para king keyaus. Iti sukat idagdag parati king obra king mayap a parasan. Ing bie tamu nung makananu yang dadake karing aliwa, maging sensitibu karing pamangailangan da ring aliwa, e mu bukud king sarili ing pigagap.”
Anting metung a susuyu king SACOP, papasyag ne ing kayang panalakaran kapamilatan ning kayang: “pamamamie serbisyu king mitmung katapatan at pagkapilitang akit ding aliwa ing Ginu king lupa ku kapamilatan da ring amanu at dapat a babie.”
Makanyan mu rin, pisyag nala ding asahan na pa anting talasuyu: a) pamiyubug ning SACOP king kayang pangatau ban maging mayap, produktibu, at epektibu, b) mayakit kapamilatan na ing lupa ning Ginu at ning SACOP, c) matatag at makapag-impluwensyang ganap, at d) KANAWAN ning bie.
Ing dating MIYATARANG KANAWAN, ngeni talasuyu na ne ning apostoladu king misyung MANATAD KANAWAN! Patutuanan ning SACOP na kapamilatan da ring programa at serbisyu para karing pakakalulu at mangailangan, mipapasiknangan la at layun mu namang ila, miyuyubug la ban mika-kapasidad mu naman magpasikan karing kapara da. Manananu na sanang ding aliwa pang miyayantabayanan at misasaupan king apostoladu e mayayari o mapuputut karela ing grasya, nune magi la naman sanang daluyan na ning grasya na ning Dios. At king pamikatagun a nung nukarin ding mirakayanan mirarake la naman king karelang grasya, karin magi yang ganap ing KANAWAN ning BIE a pengaku na ning Ginu.
