Ing Mayap A Balita – Amare et Servire, March 2022

MAKA-PILIPINAS:

Boto ko, Dangal ko, Ipagtatanggol ko!

Anting metung a Katoliku at metung a Pilipino, metung karing pekamaulagang karapatan ampong responsibilidad apin ing pamakisangkut king pulitika kapamilatan ning pamagbotu. Makanyan mu rin ing balang laikong Pilipino, mayayaus ya at malyari yang makisangkut king adwang paralan: king principled politics o kaya naman king non-partisanship. Anting kapagsadian king daratang a Mayo 9, 2022 a nung nukarin metung karing pekamaulagang kaganapan a gampanan tamu anting Pilipinu ya pin ing pamag-alal tamu karing mamuntukan king kekatamung bansa, lalawigan, siyudad, o munisipalidad. Inya pin, mayayagkat la ding balang metung kekatamu na makisanmetung king makasaysayang kaganapang iti. Kalupa na rin ning mesabi, anting metung a Katolikong talasalpantaya, mipapasyag ya ing kekatamung kasalpantayanan king pamakisanmetung tamu king alalan at lalung lalu na king pamagbotu ta mu agpang king kekatamung konsiyensiya.

Anting pamikasangkut king non-partisanship da ring laikong talasalpantaya, gagampanan nang pasibayu ning Parish Pastoral Council for Responsible Voting (PPCRV) ing kayang maulagang papel kaniting daratang a alalan. Ing PPCRV metung yang kilusan da ring laiko a “national parish-based political but non-partisan.” Iti manigobra ya para king “Clean, Honest, Accurate, Meaningful, and Peaceful Elections (CHAMP)”. Kapamilatan ning PCP II, mitatag ya ing PPCRV king saup nang Jaime Cardinal Sin at Ms. Haydee Yorac. Iti uling meyakit ing maulagang papel da ring laiko king kekatamung Santa Iglesia at king kekatamung kasalpantayanang Katoliko. Kalupa da ring mengalabasan a alalan, maragul ya ing gagampanan nang papel ning PPCRV lalung lalu na king Voter’s Education, Poll Watching, Election Monitoring and Evaluation, ampo pa pamitalakad Voter’s Assistance Desk.

Para king PPCRV – Pampanga Chapter, mitalaga ya ing SACOP anting Provincial Secretariat, i Fr. Kenneth Alde anting Chairperson, i Rev. Justin Gatus anting Assistant Chairperson, ampo i Mr. Anthony Lyndon Dizon anting Executive Secretary. Makanyan mu rin memuu ya ing SACOP miyayaliwang komite a mitutukan papel ampong responsibilidad. Mapilan kareni ila ring Finance Committee, Legal Committee, Logistics Committee, Voter’s Education / Monitoring Committee, ampo Communication / Documentation Committee. At pauli na ning pandemia at pauli na ning sitwasyun a nung nukarin ding social media platforms ding maralas a magagamit at maging paralan para ayabut ding tau, mebuu ya naman ing Social Media Communications Committee.

Para king pamagplanu at pamagsadia king alalan, manibat Agostu 2021 regular ing monthly meetings a gaganapan da ring mamuntukan ampong komite, kayantabe ring liders ampong miyembru, ning Provincial Secretariat. Mapilan karing meging pisasabian karing meetings apin reng assistance ibat king PPCRV National, ing pondung gamitan karing aktibidades ampo king pamagsadia, ing paralan para king Voter’s Education karing parokya ampong iskwela, ing paralan nung makananu yang magamit ustu ing social media, ing pamagre-activate karing coordinators ampong volunteers, ampo pa ing pamisaupan karing ahensya ning gobyernu kalupa ning PNP, IBP ampong COMELEC.

Maliban kaniti, meganap anyang Nobyembre 17, 2021 ing courtesy call ning PPCRV Pampanga, kambe da ring miyembru ning Provincial Secretariat kayantabe ring coordinators at volunteers, king kekatamung Arsobispu Florentino Lavarias, DD. King mesabing aktibidad, mikapamikatagun ban makisabi at ipalad ring planu ning PPCRV Pampanga para king daratang a alalan. Bayu ya mepupus ing pamisabi, binie ne ning arsobispu ing keyang bendisyun karing tinagun.

Kalupa ning mesabing sitwasyun king mimiral a pandemya, mekipagpartner ya ing Social Media Communications king Holy Angel University, king Archdiocesan Commission on Social Communications, ampo king DWBL 91.9 para king planu king social media engagement ning PPCRV Pampanga. Ban makapagplanu at makagawang social media plan, anyang Nobyembre 24, 2022 mekumbira ampong tinagun ya ing HAU Communicators’ League, HAU Extension Office, ACSC, ampo ing DWBL 91.9 para king meeting/planning. King mesabing pamitipun, meprisinta ya ing paunang social media plan ning HAU. Kayari ning pamagprisinta, memie lang komento ampo suhestyon ding aliwa pang institusyon a tinagun ban lalu ya apalalam ing paunang planu. Mapilan karing apikayarian king meeting ila pin ing regular posting king Facebook page ning PPCRV Pampanga ampo pa ing Radio Program ning PPCRV Pampanga king DWBL 91.9.

Kalupa na pin ning apikasunduan, meg-umpisa ne ing “MAKA-PILIPINAS”, ing radio program ning PPCRV Pampanga, king DWBL 91.9 anyang Pebrero 18, 2022, ing pilot episode. Iti maramdam ya king radyu ning arkidiyosesis balang Biyernis (3:30PM-4:30PM). Ing mesabing programa apikaramdaman ya angga king Mayo 6, 2022. Ing tagline na ning programa: “Boto ko, Dangal ko, Ipapagtanggol ko!”. Ring host para king programa ila di Fr. Alde at Rev. Gatus. Mapilan karing topics a meplanung pisabian karing episodes ya pin: Maka-Dios, Maka-Tao, Maka-Bayan, Maka-Kalikasan, Social Media Communication, Role of the Family in the Election, etc. King programa, makumbira la naman ding aliwang coordinators ampo volunteers para makapamieng updates at makapagdakeng karanasan da.

Karagdagan pa kaniti, anyang Pebrero 26, 2022 (8:30 AM-12:00 PM) meganap ya ing PPCRV General Assembly and Orientation. King saup na ning ACSC, me-livestream ya king FB page na ning PPCRV Pampanga ampo ning arkidiosesis ampo me-broadcast ya king DWBL 91.9 ing mesabing programa. Bayu ing assembly, mekumbira la ring miyayaliwang municipal ampong parish coordinators ampong volunteers at meg-pre-register la. King mumunang dake ning orientation, memie yang situationer i Fr. Kenneth Alde. Makanyan mu naman, memie yang input i Mr. Rene Galang patungkul king Pre-Election Process; megdake yang input i Mr. Banjo Serrano patungkul king Discernment Process. Para naman king kaduang dake, migdake lang input patungkul king During Election ampo Post-Election Process i Mr. Alex Yusi ampo i Mr. Nikko Jan Paje. Anting karagdagan, memie yang input patungkul king Voter’s Education i Mr. Clinton Manalang. Kayari da ring inputs, mikapamikatagun ban mipakibatan la ring kutang da ring viewers kapamilitan ning Question and Answer. King programa, memie la namang mensahe di Arsobispo Emeritus Paciano Aniceto at ing representative ning COMELEC. Mepupus ya ing programa kapamilatan ning closing remarks ampong final blessing nang Arsobispo Lavarias.

Patungkul naman king pamisaupan ning PPCRV Pampanga karing miyaliwang ahensya ning gobyernu, mekiabe ya ing Executive Secretary king Peace Covenant Signing para king Secure, Accurate, Free, and Fair Elections (SAFE). Tinagun la naman king pamitipun ring PNP, AFP, COMELEC, ampo ring miyaliwang religious leaders. Para king regional level, meganap ya iti king Camp Olivas anyang Pebrero 9, 2022. Para naman king provincial level, meganap ya iti king Provincial Capitol Grounds anyang Pebrero 17, 2022. Patungkul naman king assistance ibat king PPCRV National, mibie nala ding Voter’s Education materials ampo modules at medistribute nala karing coordinators ding materials ampo modules a makalage karing flashdrives. Anyang Marso 9, 2022, me-deliver nala man ding t-shirts a menibat mu rin king National Office. King kabilang banda, king bisa ning Circular Letter No. 10 a mipadala anyang Pebrero 15, 2022, atsu na king kasalukuyang pamagsadia para king pamag-identify parish PPCRV coordinators ampo pang pamag-organize parish volunteers. Karagdagang makasulat mu naman ing responsibilidad da ring parish PPCRV volunteers a makipag-link up king Secretariat ampo pa ing mag-organize second collections at aliwa pang financial support.

Kalupa da ring milabas a alalan, ing panagkat ning PPCRV ing gawan tayang CLEAN, HONEST, ACCURATE, MEANINGFUL, and MEANINGFUL (CHAMP) ing daratang a 2022 Elections. Iti metung yang pakibat king hamun ban maging metung a SYNODAL CHURCH OF THE POOR. Kalupa na rin ning mababanggit king Vision-Mission Statement ning kekatamung arkidiosesis: “We, the people of God in Pampanga, committed ourselves, among others, to the promotion of Responsible Citizenship and Good Governance.”

Para kareng karagdagan impormasyun, makipag coordinate tamu king PPCRV Pampanga Secretariat kareng numero 0977-142-2170 / 0977-14-2169 (Globe) and 0969-462-7469 / 0969-462-7467 (Smart).

Leave a comment

Your email address will not be published. Required fields are marked *