PANULU: MANATAD KANAWAN

by Leilani Dizon

Madalas tamu pung daramdaman kareng mangatua neng mipagkwentu la, “agyang saktu mung milalabas ala mu sanang masakit” uling neng atin pin namang masakit metung miyembro ning pamilya, balamu masakit ya naman ing buong pamilya.

Lalu na pa naman ngeni, atnang kamal istung mikasakit ka, ali mu kabud pamayad king ospital at doctor ing paki-isip tamu, nune pu pati na panulu.

Anya naman ing Social Action Center of Pampanga, tinatag ne anyang 2015 ing SACOP-Panulu, metung yang “Drug Distributor and Wholesaler”. Nasa napu niting proyekto ing makapamisaling panulu a dekalidad at mura. Kilub na ning apulung (10) banua, meging kliyente no ring miyayaliwang barangay at local government units (LGUs). Maragul ya naman asasawup iti kareng medical missions at health programs da reng miyayaliwang non-government organizations, parokya, at eskwelahan.

Nanu pung pamiyaliwa na ning SACOP PANULU kareng aliwang distributors? Mumuna, parti na pu ning panakitan na, panyaup la pu at gagamitan kareng miyayaliwag serbisyu at apostolate ning SACOP. Kadua, FDA approved la ngan pu ding kekatamung panulu a pamisali. Ing storage na pu fully air-conditioned ya with room temperature pu na ali lalampas king 30 degrees.

Ining milabasan a Hunyo 27, 2025, king ika-10 Anibersaryo ning panga rehistru na ning Mayap Ya Ing Dios, Inc. king Food and Drug Administration (FDA), me bendisyun ya ing bayu nang opisina at pharmacy extension ning SACOP-PANULU. Iti, ba na lang apagsilbyan mas epektibu at masalese ring kayang kliyente kapamilatan na ning bayung pasilidad para king “good distribution and storage practices” a kailangan para karing drug establishments.[1]

Mika simpling selebrasyun at mika-mini medical mission mu naman a tegunan da pu ding volunteer doctors ning SACOP, y Dr. Mike Mangulabnan at Dr. Jerry Tioleco. Metung pu kareng partner ning SACOP, ing Kapampangan Development Foundation (KDF) yang menimuna king X-Ray, ECG at laboratory. Tegunan de rin ing selebrasyun ding kekatamung partners kareng miyaliwang barangay at mapilan a botika.

Tutu pung king kilub na ning apulung (10) banua, madakal nala pu ding meging kayantabe at asaupan na ning SACOP-Panulu. Nasa na pa pu na dakal lapa reng asaupan na, lalu ding masakit a pakakalulu at deng kapatad tamung atin ng “maintenance”.